Atualità
Baur y Kostner diretëures nueves per la scoles ladines
USP – Elisabeth Baur y Maria Kostner ie (NCUEI) ai 05 de agost unides nciariedes ufizialmënter sciche diretëures nueves tla scoles ladines. Elisabeth Baur de Urtijëi sëurantulerà la direzions dl lizeo d’Ert y dla Scola Prufescionela a Urtijëi. Maria Kostner da Bula sëurantulerà la direzion raionela dl’elementeres de Urtijëi y Runcadic cun la scola mesana de Urtijëi. Si lëur scumencerà ufizialmënter cun l prim de setëmber.
Per l prim iede tla storia dla Scola ladina unirà l Lizeo d’Ert y la Scola prufescionela per l artejanat artistich menedes da na direzion sëula. La lege nueva dla reforma dla scola auta tla Provinzia de Bulsan à udù dant de mëter adum direzions y chësc ie nce unì fat tl’autra scoles tla ziteies.
De setëmber sëurantulerà Elisabeth Baur doi scoles che à na fundamënta urganisativa defrënta. L Lizeo d’Ert à n urdenamënt a carater statel y la scola prufescionela a carater provinziel. “L lëur de Baur ie perchël plu cumples, sce n pënsa marë a la gestion dl personal” spiega l ntendënt Roland Verra. Te chësta direzion nueva vala de purté inant l’atività scolastica per feter 145 sculeies y 45 culaburadëures danter nsenianc y personal de scola. “Mi mpëni sarà chël de purté inant la gran tradizion de chësta doi scoles y nce de purté ite inuvazion cunscidreran i bujëns di jëuni” à dit Elisabeth Baur.
Maria Kostner sëurantulerà la majera direzion dla scoles ladines y menerà la scola mesana de Urtijëi y la scoles elementeres de Urtijëi y Runcadic cun de ndut 633 sculeies y 110 culaburadëures. Dantaldut la scola mesana de Urtijëi à ti ani passei demustrà de vester drët inuvativa, la fova stata la prima de duta la provinzia a scumencé cun l nseniamënt de nglëisc, à nsenië sistematicamënter a adurvé l computer y à abù l snait de sperimenté la sezion de mujiga. “Sota la direzion de Kostner uniral scumencià cun formes de nseniamënt inuvatives jan inant cun n proiet scumencià tl’elementera per ti lascé plu respunsabltà al sculé” nsci l ntendënt ala Scola ladina. N mpëni nia de carater didatich che reveda Maria Kostner sarà pona nce l ngrandimënt dla scola mesana de Urtijëi y l baraté i vieresc ala scola elementera, lëures che unirà fai dal Chemun de Urtijëi. “Mi mpëni sarà de purté inant l gran lëur che ie unì fat ti ultimi ani y nce de purté ite cunzec nueves. Sun la basa dl’esigënzes ulëssi lauré ora prioriteies per ruvé a n cunzet de lëur per i proscimi 3-4-5 ani” à dit Maria Kostner.
L lëur dla diretëures nueves scumencerà ufizialmënter ai prim de setëmber. Si ncëria sun chësta sëntes vel per trëi ani. “Tla Talia iel ultimamënter suzedù plu suvënz che diretëures muessa sëurantò nce d’autra scoles. Tl daunì uderan ciuna esigënzes che tumerà sun nosta direzions” dij Roland Verra. Tla Scola Ladina iel de ndut 8 direzions. Cun la doi diretëures nueves an arjont la pariteticità de cater ëiles y cater ëi.
La sëurandata nueva de direzions stluj nce ju na cariera longia de trëi diretëures. Helmuth Senoner ova dl 1963 scumencià a nsenië materies letereres y fova pona dl 1976 deventà diretëur dla scola mesana de Urtijëi. Te si 36 ani da diretëur iel unì fat truep vares inuvatives tl nseniamënt n cont de alfabestisazion plurilinguala y nseniamënt plurilngustich ntegrà.
Karlheinz Mureda ova dl 1965 scumencià a nsenië educazion tecnica tla scola mesana de Urtijëi y fova l ann 1980 uni nciarià a sëurantò la direzion dla Scola d’ert. Un de si majeri mpënies ie sta chël de purté inant l bon inuem dla scola curan nce proiec de culaburazion cun firmes, d’autra istituzions furmatives, academies d’ert, mostres y espusizions. Ntan si 31 ani da diretëur iel nce unì frabicà de nuef la scola.
Julius Senoner à dat ju si ncëria provisoria da diretëur dla Scola prufesciunela y fajerà inò l’atività da nseniant.
---
N auter comunicat stampa sun chësc argumënt:
17.05.2010 Trëi diretëures nueves tla scoles ladines
as
