Atualità
Sëurandat 34 stieres per nsenianc ladins, 59 i dis che vën
USP - 34 nsenianc ladins à (NCUEI) ai 05 de agost pudù pië do na stiera sciche suplënza anuela tla scoles ladines. Tla Ntendënza ladina a Bulsan iel unì sëurandat la stieres per i nsenianc dla scoles elementeres, mesanes y autes che à fat l’abilitazion y che fova tla graduatories aldò. 59 stieres per suplënzes unirà i proscimi dis sëurandates diretamënter dala direzions de scola aldò dla graduatories de istitut per i nsenianc zënza abilitazion.
Per la scoles elementeres ladines iel unì sëurandat 9 stieres per l ann de scola 2011/12. Leprò ruva mo 20 stieres che ie unides slungëdes dal ultimo ann de scola ajache les ie restedes sun l medemo post. Per la scoles mesanes y autes iel unì sëurandat 4 stieres per nsenië materies defrëntes ntan l proscimo ann de scola. Chëst ann iel nce unì dat ora una stiera de rodul per materies letereres tla rujeneda tudëscia. Chësta stiera tl Istitut Raetia a Urtijëi ti resta ala nsenianta nchin a si pension.
I nsenianc che ne à nchinamò nia pudù fé l’abilitazion y ie tla graduatories de istitut puderà ntan i proscimi dis sëurantò na suplënza diretamënter dai diretëures de scola. La se trata te chësc cajo de feter 32 stieres tl’elementeres ladines, de 15 tla scoles mesanes y de 12 stieres ntieres tla scoles autes. Leprò ruva mo ncëries per nsenië me vel ëura y 26 stieres per nsenianc de sustëni te duc i liviei de scola.
Chësta cumpëides de stieres che vën sëurandates per l proscimo ann de scola vën a se l dé ajache truep nsenianc à bele na stiera segura, tlameda na stiera de rodul. La situazion che l ie de plu nsenianc zënza abilitazion depënd dai cuncorsc scric ora. “L ie bele 6 ani che l ne ie nie unì scrit ora n cuncors per ejams y tituli per giapé l’abilitazion” spiega Paul Tassser dla Ntendënza ladina.
La stieres anueles tla scolines ladines unirà sëurandates n merdi ai 16 de agost a Piculin.
as
