Politica | 11.08.2011 | 17:23

L pont de Durnwalder 3/ seguré la finanzes, seguré l daunì

USP - „I raporc dla regions cun l Guviern a Roma ne ie nia boni. Sce ne assan nia bele stlut ju l’acurdanza de Milan, ne fossela sën nia plu mesun.“ L presidënt dla Provinzia Luis Durnwalder à te si cunferënza stampa da instà, (NCUEI) ai 11 de agost a Falzes nce rujenà de seguré l bilanz provinziel y l daunì dla provinzia dajan plu forza al’Autonomia.

La reformes che vën bele da vint ani mpermetudes ne ie mo mei unides fates. Nsci à l mancë dl Federalism nce cunseguënzes sun Südtirol, ajache uni var de autonomia per la regions a statut normal, ëssa na fazion automatica nce sun Bulsan y Trënt. „Te chël mumënt che la regions talianes giapa plu respunsabltà y cumpetënza de tò dezijions, ruvëssen nce a na soluzion i problems de duta la Talia“ à dit Luis Durnwalder a Falzes.
Nce sce l ie tan rie fé a Roma, an mpo arjont normes de atuazion nueves per tant che reverda la Chëurt di conc, la cherta de identità per i ladins dl chemun de Ciastel y l parch naturel dl Stelvio. Debujën fossel mo de giapé la cumpetënza te cuestions de ambiënt, nsci Durnwalder. 

Ntan che n aspieta sun l federalism dla chëutes à Südtirol tres l’Acurdanza de Milan bele arjont la segurëza sun 90% dla chëutes che vën paiedes te nosc raion. Chëstes ne muessa nia plu passé tres Roma y pierder truep tëmp, ma les ruva śën diretamënter tla casses provinzieles. „Per nëus uel chësc di che ne adroven nia plu da tò ca d’autri scioldi nchin che giapon nosta pert da Roma“ nsci l presidënt.
Tl’acurdanza cun l stat iel nce pertes che reverda l’autonomia dla chëutes. A Bulsan iel bele unì smendrì la njonta IRAP. „Mo d’autra reduzions puderà unì fates per chëla firmes che se da ju cun tueda y svilup o chiche pieta stieres nueves per esperc, ma nia n generel per duc. Nuviteies iel nce unì cunedì per la njonta al chëuta IRPEF. „Nce tlo ne ulons nia smendrì n generel per duc, ma auzé la sëida per per chëi che davania demanco y la families“.

La tratatives per sëurantò la Posta y la RAI de Bulsan va inant. „Ulon ti tò ju custimënt al stat ma nia zënza pudëi rujené pea“ à dit Durnwalder. Per la RAI dëssel vester tler che la lidëza jurnalistica muessa unì mantenida, ma che n uel rujené pea tl’urganisazion, l personal y la njinies tecniches. L servisc dla Posta muessa, aldò dl presidënt dla Provinzia, unì mantenì nce ti luesc da mont.

L presidënt à nce nunzià l pat de stabilità che dëssa unì tenì ite un n iede y nia trëi iedesc: „Ne pudon nia tenì ite l pat de stabilità cun la Provinzia, i chemuns y nce la istituzions. Sce ne fajon nia debic, muessel baste sce la Provinzia tën ite la stabilità“ à dit Durnwalder.

La descuscion de autodeterminazion ie ti uedli dl presidënt defin me populistichs. „Spusté la sëides fossa me mesun cun la cumenanza nternaziunela a una y chësc ne ie te chisc ani nia da se nmaginé.“ La rezeta de Durnwalder ie chëla de giapé mo cumpetënzes da Roma y svilupé inant l’Autonomia.

as

Galaria dales fotografies

“L’acurdanza de Milan ne fossa sën nia plu mesun”: Luis Durnwalder cun jurnalisc’a Falzes: La (foto USP/Pertl)