Atualità
La detlarazion unificheda de davani y avëi muef ai prim de setëmber
USP – N juebia ai prim de setëmber scumëncia n tëmp nuef tla politica soziela dla Provinzia de Bulsan: la prestazions y la tarifes unirà calculedes sun basa dla detlarazion unificheda de davani y avëi (DURP/EEVE). Cun chësc sistem nuef vëniel n iede scumencià tl ciamp saniter y soziel. Per scumencé a lauré cun l sistem nuef zënza dificulteies iel ti mënsc passei unì nsenià ju 430 culabuadërues de servijes soziei y saniteres, partonac y ufizies de assistënza fischela.
“Cun la detlarazion unificheda (DURP) vëniel registrà l davani y l avëi dlonch unfat a na maniera da avëi na basa per na spartizion giusta di cuntribuc”. Chësc pensier dl assessëur Richard Theiner porta dant l pensier zentrel dl sistem nuef per dé ora cuntribuc y assistënza. La repartizions provinzieles de Theiner ie la primes a mëter n drova l sistem nuef. Cun la detlarazion unificheda fej la Jonta provinziela n gran var inant n cont de dé ora prestazions, cuntribuc, servijes y aiuc aldò dl bujën. Te truep caji ie l bujën tacà ala situazion finanziera dl zitadin. L aiut giata chiche à aldò de si situazion finanziera nce l dërt de n aiut. Te chësc cuntest iel debujën de na detlarazion dl davani y avëi che ie nchinamò unì damandeda te formes defrëntes aldò dla prestazion.
“La bases de calculazion defrëntes y i sistems defrënc, à ti ani passei purtà a na cumplessità de sistems ulache l ie rie da se ntupé. Sëuraprò iel unì fat na cëria de burocrazia” spiega l assessëur al soziel y sanità. Chësc dëssa śën avëi na fin. Cun l prim de setëmber possen scumencé a dé ju la detlarazion unificheda. De utl per l zitadin y per l’aministrazion ie de fé la detlarazion deberieda cun la prima dumanda de servisc o cuntribut. L zitadin possa damandé n aiut ai servijes soziei y saniteres, ai patronac y ai ufizies de assistënza fischela (caaf) di sindacac, dla assoziazions economiches y d’autra urganisazions. Fé la detlarazion y la dé ju ne ie nia da paië per l zitadin.
Per scumencé cun la detlarazion unificheda ie dut njenià. La banca nfurmatica ie anjenieda y i culaburadëures di servijes che pieta aiut à giapà na furmazion per pudëi dal prim de setëmber pië do la detlarazion y la dé ite tl sistem a na maniera efizienta, zënza fai y zënza pierder tëmp. De lugio y de agost à 430 persones fat i cursc de preparazion.
La Provinzia de Bulsan à fat na cunvenzion cun i servijes de assistënza a na maniera da pité n aiut daujin al zitadin y da sparanië. “Te chëla che l ie unì dat ora la cunsulënza y l lëur de dé ite dla nfurmazions tl sistem, ne ti toma chësc lëur nia ai ufizies provinziei. La Provinzia giapa la detlarazion te forma digitela, sparania tëmp, custimënt y papier. Sëuraprò ti vëniel tëut ju lëur ala purtines ulache l ie nchinamò unì dat ju detlarazions te plu formes” nsci Theiner n cont di vantajes dl sistem nuef.
Nfuramzion n cont dla detlarazion unificheda de davani y avëi ie da giapé sun la plates web dla Provinzia (www.provinz.bz.it/sozialwesen). Iló iel nce publicà na tabela cun duc i servijes che taca adum cun la detlarazion unificheda. Da abiné iel nce nfurmazion sun la prestazions: la cundizions de basa, la dates, la lueges ulache n possa dé ju y chemunanzes familieres. Nce l formuler cun la ndicazions per l scrì ora ie da abiné online. Da pert dl dipartimënt de Theiner uniral tla proscima enes nce spartì ora n cudejel de nfurmazion.
D’autri comunicac stampa sun chësc argumënt:
Manco burocrazia per cuntribut a families y rendiconc intenres
Cunsulënza debant sun la detlarazion de avëi: acurdanza cun patronac
as
