Atualità
Proiec a Badia y sun Sela azetei dala Cumiscion per la defendura dla cuntreda
USP – Na streda daujin a prei de Armentara, l cantier sun Jëuf de Sela y stredes per ruvé permez a luesc da paur tl chemun da Ciastel ie stai i proiec che reverda l raion ladin, tratei n merdi, 30 de agost, dala Segonda cumiscion provinziela per la defendura dla cuntreda. Chisc trëi proiec ie unic azetei cun vel cundizion.
La streda Valgiarei-Andrac daujin ai prei de Armentara possa unì cumededa. Chësta streda tl chemun de Badia ie tl raion dl parch naturel Fanes Sennes Braies. Davia che l se trata nce de n raion sota defendura „Natura 2000“, à l proiet de ressanamënt dla streda messù unì valutà n cont dl dann ambientel. La cumiscion per la defendura dla cuntreda à azetà l proiet a cundizion che l vënie mantenì l bosch, che l vën avisà demez l’eghes sun aghei davierc y che la Furestela cële do i lëures de ressanamënt.
Per mëter a post l raion daujin ala cësa dl Jëuf de Sela, dessot pert dla plaza dai auti, se à la cumiscion provinziela damandà na cauzion de 8000 euro, l cuntrol da pert dla Furestela y che i prei ulache l ie unì laurà vënie inò fai crëscer ite. I cumëmbri dla cumiscion ova da permò vijità l cantier y ti ova dat na valutazion positiva. “L ie n cantier menà sciche l toca. Da pont de ududa dla cuntreda fejel plajëi che cun chisc lëures iel nce unì metù truepa pertes sot a tiera” à dit l presidënt dla Segonda cumiscion per la cuntreda, Adriano Oggiano. I 2000 metri cubich de material che ie unic giavei ora dëssa śën unì metui ju danter la stazion a val y la ciajea (dl CAI) dessotpert dl Jëuf de Sela.
Tl chemun de Ciastel dëssa 32 stredes per ruvé permez a luesc da paur, unì asfaltedes. Cumpedan adum chësta stredes ruven de ndut sun na lunghëza de 7,7 chilometri cun na spersa de 8000 metri cuadrac. La cumiscion à azetà l proiet de asfalt dl cunsorz per miuramënt dl fonz da Ciastel se damandan che l vënie fat crëscer ite la pertes dlongia streda y che la Furestela cële do i lëures singuli.
as
