Atualità
Cuntra les codes d’auti: terza striara dan la portina dl daz de Vahrn
USP - Cuntra les codes d’auti sön la strada de Puster – dantadöt i dis che i sciori röia adalerch y che ai s’un va – val debojëgn ince de mosöres tecniches y infrastrotorales. Insciö àn metü man incö (ai 7 de novëmber) da fà la terza striara sön la strada de Puster dan la entrada dla portina dl daz dl’austostrada a Vahrn.
La Junta provinziala à metü a jì mosöres por smendrì le trafich sön la strada de Puster, dantadöt i dis olache i sciori röia adalerch o pëia ia. Dlungia l’informaziun ai sciori sön can rové adalerch y can pié ia, ćiàron inće da fà laûrs por miorè les infrastrotöres, che vëgn coordinà dal assessur provinzial por i laûrs publics Florian Mussner. Pro chisc laûrs inće le mioramënt dl transiamënt zircolar dan l’entrada dl’autostrada a Vahrn. "Ći che an adora a vigni moda é na striara aposta por che che oj a man dërta, y plü avisa danter le punt dl Riggertal y le transiamënt zircolar", spliga l’assessur provinzial.
A chësta striara vëgnel laurè concretamënter da incö inant. Da incö inant é le transiamënt limité sön i pröms 250 metri dla strada de Puster, ajache la striara é gnüda restrënta a 3, 5 metri porvia di laûrs por oje a man dërta. I laûrs vëgn fać dala sozieté dl’autostrada dl Prener y döra feter n mëis. Daldô arà la strada de Puster na terza striara sön chësc tòch.
Implü se crüzia le Sorvisc por la segnalaziun dles strades dla Provinzia da mëte sö ti proscimi dis döes tofles eletriches mobiles sön la strada de Puster, y plü avisa dan la sortida Natz y püch dan la sortida cuntra Aicha. Chëstes tofles mostrarà sce al manacia codes d’auti sön la strada de Puster o sön l’autostrada dl Prener, strades alternatives devers süd y nord.
usp
