Atualità
Stat uel fermé scioldi provinziei, Jonta a crëta a Mario Monti
USP – Aldò dl ultimo pruvedimënt dl Stat per smendrì la prescion finanziera sun la Talia, tlamà “maxiemendamento”, messëssa la Provinzia de Bulsan fermé autri 49 milion de euro. La situazion muessa mo unì studieda plu a puntin.
Di scioldi udui dant tl bilanz provinziel, ne dëssa 285 milion de euro nia unì dai ora per stabilisé la situazion finanziera. Aldò dl ultima dezijions ne dëssel nia unì dat ora 49 milion sëuraprò. “L pruvedimënt de Roma ie mo tan frësch che l muessa mo unì studià tres plu avisa. Sema che la tarifes di prufesciunisć liedies dëssa unì liberalisedes y che la burocrazia dëssa unì tëuta demez defin” à dit Durnwalder te cunferënza stampa do la senteda dla Jonta (NCUEI) ai 14 de nuvëmber.
Ntan chëst ena uniral studia tres la cunseguënzes de chësta ultima manovra dl Stat sun la provinzia de Bulsan. Tla senteda dla Jonta provinziela, dl’ena che vën, uniral pona tëut la dezijion sce se paré cun recurs. L presidënt dla Provinzia fej cont cun mo d’autri pruvedimënc per stabilisé la situazion finanziera dla Talia.
“Son cuntënt de n guviern nuef a Roma. Speri marë che n ebe l snait de di l’aurità ala jënt, nce sce l ne fajerà nia plajëi”, nsci à dit Durnwalder n cont dla nomina de Mario Monti a presidënt dl Cunsëi di Ministri. Durnwalder à crëta che Monti ebe l snait de lauré ora programs de serietà y de i realisé.
as
