Atualità
Finà l puent nuef sun Jëuf de Sela
USP – Chisc dis iel unì fat l colaudo per l puent nuef che l Assessorat provinziel ai lëures publics à lascià fé sun Jëuf de Sela. Daujin ala cava iel unì fat da nuef n puent che ne garantivia nia plu segurëza per i mesuns pesoc. Per chësc pruvedimënt de segurëza sun streda y per arjonjer plu saurì Gherdëina, à la Provinzia de Bulsan fat na nvestizion de 150.747 euro.
L puent nuef al chilometer 26,9 mesura 10 metri de lunghëza y, de ndut, 7 metri de larghëza. I lëures da muradëur fova bele unic stluc jù ala fin dl instà. Chisc dis iel unì finà l collaudo.
L custimënt de ndut ie cun 150.747 euro stat scialdi mënder de chël che n ova proietà. “Da una pert à la firma Enrico Rella de Urtijëi lascià do si pert de 25% y dal’autra pert ons pudù adurvé materiai che l Servisc per la stredes ova bele te chësc raion, a chësta maniera ons dat ora 50.207 euro demanco” spiega l assessëur Florian Mussner. La proietazion dl puent, direzion di lëures y mesurazions tecniches ie unides fates nstës dal Assessorat ai Lëures publics.
Sun la basa de analises di puenc sun la stredes provinzieles ova chësc puent al chilometer 26,9, dlongia la cava, su Jëuf de Sela giapà gran priorità per l fé da nuef. N auter puent, iló daujin muessa ënghe unì fat da nuef, per chësc an bele nvià via la proietazion.
as
