Atualità
Lege per l cumerz: degun raions nueves
USP – La Jonta provinziela de Bulsan ie contra la puscibltà de scrì ora raions cumerziei. Chësta dezijion ie unida tëuta (NCUEI) ai 05 de merz y nsci iel unì stlut ju la cunsultazions n cont di pruvedimënc per limité la liberalisazions dl Guviern talian. Ti proscimi dis dëssa la lege per l cumerz passé te Cunsëi provinziel.
Sce l ne vën nia udù dant la puscibltà de scrì ora raions cumerziei, ne iel nianca debujen de n autorità aldò. Cun la liberalisazions tl Guviern talian tumerà demez l’autorisazions, la limitazions, la tabeles de marcanzia y i cuntinghënc per l’ativiteies cumerzieles. “La pruposta de lege provinziela se destaca bën n pue’ dala diretives da Roma, purempò iel da speré de la pudëi purté inant y che la ne vënie nia cuntrasteda dala suneria costituzionela” à dit l presidënt Durnwlader do la senteda dla Jonta provinziela. Tla strutura geografica dl Südtirol dëssa la lege provinziela per l cumerz seguré l’ativiteies cumerzieles nce ti mëndri luesc, respetan dal autra pert la diretives da Roma.
La pruposta de lege per l cumerz ne vëija dant deguna limitazions ti raions urbanistics “A”. Ti raions “B” iel udù dant na spartizion 60-40% per l’abitazions y cumerz cun servijes. Per i raions “C” ie me plu udù dant 16% per l cumerz y servijes.
Ti raions de produzion iel me udù dant de pudëi vënder a detail prudoc de cin ciamps: auti, mascins da paur, materiai da frabiché, mubilia y buandes te majera cunfezions. Duc i prudoc che ie unic fai te n raion de produzion dëssa pudëi unì vendui sun l post.
Strutures cumerzieles ne dëssa per norma nia unì realisedes te raions categurisei sciche vërt agricul. Ezezion fej tlo l vënder de prudoc di luesc da paur o prudoc che ie liei a strutures che ie bele (per ejëmpl la stazion pra la streda dala rodes, la stazion dal penzin che possa vënder prudoc o l vënder prudoc pra la plaza dal Golf).
as
