Politica | 23.04.2012 | 14:15

Jonta uel seguré l bilanz provinziel 2013 y damanda tratatives

USP – La Jonta provinziela uel ruvé a na regulamentazion dla finanzes cun l Stat per seguré l bilanz provinziel ti ani. Tla senteda (da NCUEI) dl 23 de auril iel unì prejentà tant che l Stat dà ora tl Südtirol. Chësta soma cumporta na mesura mpurtanta de referimënt per la tratatives che ie de utl per pudëi prugramé l proscimo bilanz provinziel.

L Stat talian da ora feter 400 milion de euro tl raion de Südtirol. “Tlo ne iel nia calculà la pert dl Südtirol per custimënc generei sciche per l parlamënt, per ntervënc di saudeies taliani oradecà o per i cuntac cun d’autra nazions” à spiegà l presidënt Durnwalder riesc do la senteda. Sce n cunscidra i debic dl stat, pudëssa mo ruvé leprò 178 milion de fic sun i debic. “La Provinzia de Bulsan ne à nia debic, perchël ne vëiji nia drët che nes vën ciariei su i fic sun i debic dl stat” à dit l presidënt dla Provinzia.

L custimënt che l Stat à tl Südtirol ie na grandëza de referimënt per pudëi scumencé tratatives y nsci ruvé a na preparazion dla proscima bilanz. L presidënt di ministri Monti à tl minister Gudi segurà na persona de referimënt per la tratatives danter la Provinzia de Bulsan y l Guviern, ma chëstes ne à mo nia scumencià. Ntant muessa Bulsan aldò dl pat de stabilità fermé 300 milion y zënza pudëi i dé ora. “Bel plan perdons la crëta tl Stat che pudon mo adurvé chisc scioldi y che ne messon nia i mandé a Roma” à dit Durnwalder. Te chësc mumënt iel mo de plu custions che ne ie nia defin tleres y nsci ne san nia sce n possa veramënter nuzé duc i scioldi tla casses provinzieles. Aldò dl 860 milion de euro che l Stat se damanda dala regions autonomes per ressané si finanzes, unissa la Provinzia de Bulsan a paië 120 milion y leprò mo 60 milion da pert di chemuns. Nia tler ne iel, aldò de Durnwalder, sun ciuna chëutes che resta veramënter l 90% tl Südtirol.

as

Galaria dales fotografies

La Jonta provinziela ntan si senteda tl palaz Widmann a Bulsan;