Atualità
L assessëur Michl Laimer da jù si ncëria
USP – Michl Laimer da jù si ncëria da assessëur provinziel. Chësc var ie gaujà dala dezijoin dl publich minister che à damandà de nvië via la pruzedures de pruzes contra Laimer. „Da pont de ududa dl dërt penal, sons segur che dan suneria uniral demustrà mi inuzënza, purempò tiri la cunseguënzes a livel politich sciche ovi bele fat al savëi danora“ dij Laimer.
Bele da enes ova Michl Laimer stlarì che l ëssa dat ju si ncëria te chël mumënt che l publich minister se damanda de nvië via la pruzedures de pruzes. „Chësc ne ie dessegur de no n dé pro de gauja, davia che ne sei nia da vester tl tort, ma l ie n var che ie debujën per stravardé mi persona, mi familia y mi ncëria“ dij Laimer do che l ie unì fat al savëi la dezijion dl publich minister.
La dezijion ne ti fej al assessëur nia marueia: „aldò de cie che ie suzedù ti ultimi dis y enes, fovel per me tler che l publich minister ne ëssa nia plu mudà si pusizion y ëssa dat inant la dezijion ala suneria.“ Laimer ie daniëura de chëla che la pruzedures mustrerà su che l ne se à nia fat gaujes. „Ne ei mei fat nteresc privac, ma ei tëut la dezijions do savëi y cusciënza, y chëstes ie aldò de dërt y di documënc states la drëtes, y sëuraprò la miëures per la Provinzia.
Michl Laimer ie stat 18 ani tla Jonta provinziela. „Te chësc tëmp ei fat mi lëur cun gran mpëni, cunvinzion y legrëza“, dij Laimer cialan de reviers a n tëmp nteressant y ulache l à pudù mparé truep. Sciche majeri suzesc rejona l assessëur dl recunecimënt dla Dolomites a arpejon naturela mundiela UNESCO, i vares inant tecnics per la defendura dl ambient y dl’ega da bever, l fé valëi di parcs naturei y la mpustazion de viers de na politica dl’enerigia sustenibla cun truep mplanc de biomassa y per nuzé l’energia dl surëdl.
Nce l seguré dla cumpetënza sun la forza dl’ega ie per Laimer n’arjonta mpurtanta di ultimi 18 ani. „L nes ie stat mesun avisé l Südtirol sun la streda de na Provinzia-tlima y l svilupé a n model da mustré ca“ dij Laimer. Chësta streda sustenibla vëniel jit inant nce cun d’autri ciamps. „Cun l manifest per l Südtirol ons anjenià la cundizions per n bon daunì“ fina via Laimer.
as
