Politica | 03.09.2012 | 14:14

Jonta provinziela prugramea la reduzion de custimënc

USP – Aldò dla lege statela “Spending Review” muessa nce la Provinzia smëndrì i custimënc per pudëi ciafië tl 2013 cun n mënder bilanz. La Jonta provinziela à (NCUEI) ai 03 de setëmber scumencià a prugramé cuncretamënter la reduzion de custimënc per i assessëures, l mëter adum ufizies y l tò su personal. A chësta maniera unissel sparanià da 25 a 30 milion de euro.

"Per ciafië n auter ann cun n mënder bilanz provinziel iel debujën de vares cuncrec per smëndrì i custimënc dla Provinzia" à dit l presidënt dla Provinzia Luis Durnwalder riesc do la senteda. Pra i custimënc persunei di assessëures ulëssen sparanië 20% tl fond de reprejentanza, auti de servisc y viages. Ma chësc dëssa nce valëi pra i culaburadëures provinziei n generel canche l se trata de trasfertes, viages o lëures ora d'ëura.

Per sparanië uel la Jonta provinziela nce smendrì la cumpëida de ufizies provinziei, i metan adum. L presidënt Durnwalder à stlarì che la Jonta ne uel nia mëter adum la trëi ntendënzes ala scoles, ma che l fossa na bona a pudëi mëter adum na sëula aministrazion per duta la scoles dl Südtirol. I nsenianc dëssa judé a sparanië pra i lëures ora d'ëura. Ti ani passei fovel unì spendù 8 milion al ann per chësta ëures sëurora di nsenianc. Chëst ann ruven me pu sun 5 milion y per l ann che vën uniral me plu prugramà 2 milion de euro.

L program de smëndrì 3% dl personal te tëmp de cin ani ne sarà nia mesun tenì ite. Chësc dantaldut ajache l'età da jì n pension ie unida auzeda cun n decret dl guviern Monti. Purempò tën la Jonta provinziela a si program de reduzion dl personal.

Cun duc i pruvedimënc unissa la Provinzia, de Durnwalder, à sparanië da 25 nchin 30 milion de euro. La Jonta provinziela ne à mo nia delibrà chisc pruvedimënc ajache tla proscima sentedes uelen mo traté d'autra prupostes di assessëures.

as