Sanité / Sozial | 12.11.2012 | 14:41

421 cuatieres soziei nchin a n auter ann

USP – Nchin a n auter ann iel udù dant de sëurandé 421 cuatieres soziei. Chësc ie unit ora dala relazion dl assessëur Tommasini sun l atività dl Istitut per cuatieres soziei IPES, ntan la senteda dla Jonta provinziela (da NCUEI) dl 12 de nuvëmber.

Davia che l ie deventà drët rie a abiné grunc da pudëi frabiché cuatieres soziei, dantaprima ti majeri luesc, iel per l Istitut per cuatieres soziei deventà de priorità a cumedé ca vedli cuatieres.

Ajache che l ie stat mesun ressané na majera cumpëida de cuatieres puderal nce unì metù a desposizion n cuatier a jënt che ova nchinamò massa puec ponc. "L program de ressanamënt lascia pro de sëurandé nce n cuatier a chiche à manco de 25 ponc" à dit l presidënt dla Provinzia.

Na pert di 421 cuatieres soziei dëssa aldò dl presidënt Luis Durnwalder mo unì sëurandai chëst ann, y l'autra pert pona d'ansciuda. De duc chisc cuatieres ne n iel nce 95 de nueves. Te feter 10% puderà abité zitadins che vën da ora dla Union Europea.

L IPES à te chësc mumënt n avëi de feter 13.500 cuatieres y fej cont de pudëi ressané feter 350 cuatieres al ann. Na tel cumpëida de cuatieres vën uni ann liberei y possa unì sëurandata a d'autra families.

as