Atualità

Laûr | 11.03.2013 | 14:26

7 ponc y na milion de euro acioche jëuni abine da lëur

USP – Te chësc mumënt iel tl Südtirol 11,6 percënt di jëuni zënza lëur. Per ti judé ai jëuni a abiné na stiera à la Jonta provinziela (NCUEI) ai 11 de merz dat pro n program de set ponc y n finanziamënt de na milion de euro. Aldò de ultima cumpededes iel tl Südtirol 626 jëuni sota 30 ani zënza lëur y che ti mancia cumpetënzes per abiné na stiera.

Danter chëi sota 30 ani che se à lascià nuté su tla lista zënza lëur iel nce ëiles n maternità y de tei che lëura la sajon. Aldò dla repartizion provinziela per l lëur ne n iel aldò de ultima cumpededes 1336 che ie bele passa trëi mënsc zënza lëur. Te na situazion problematica ie dantaldut 626 jëuni che ti mancia la cumpetënzes per giapé na stiera.

La Jonta provinziela à dat pro n program de ntervënt che dëssa dantaprima judé la grupa problematica. La se trata tlo de pratica ntan l instà y lëures per l instà, dla ntegrazion de jëuni cun handicap per n tëmp plu lonch, de pruvedimënc per na majera trasparënza dla pusciblteies che pieta l marcià, de pusciblteies de pratica per chëi che ne à degun lëur, de cursc de rujeneda, de na valorisazion di mestieres tecnics y pratics, y de pruvedimënc acioche jëuni ne lasce nia la scola y acioche i ne adrova nia tan giut a abiné si prim lëur.
"Chisc ponc se lascia realisé zënza mudé vel lege, perchël ti ons crëta che i possa prësc unì metù n droa" à dit l presidënt Luis Durnwalder riesc do la senteda dla Jonta provinziela.

I assessëures provinziei ie stai a una de mëter a desposizion na milion de euro per la realisazion dl program. I ufizies de cumpetënza a una cun la scoles y i patrons de lëur, laurerà śën ora i programs plu avisa per judé i jëuni a ruvé pra na stiera.

Judé i jëuni a ruvé pra na stiera: chësc se à la Jonta provinziela tëut dant cun l program da set ponc.