Atualità
I sistems informatics dl’aministrazion publica unirà unifichei
USP – Per pudëi lauré cun la medema nfurmazions y per se baraté ora i dac, uniral metù a jì n sistem informatich unificà danter Provinzia, spediei, cumuniteies raioneles y chemuns. Per chësc mpëni à la Jonta provinziela (NCUEI) ai 11 de merz dat pro de aumenté l capital dla sozietà de nfurmatica SIAG.
Deberieda cun i reprejentanc dla sozietà de nfurmatica SIAG à la Jonta provinziela tratà l bujën de mëter a jì sistems de nfurmatica acioche de plu aministrazions publiches, ma nce defrënta repartizions dla Provinzia ruve plu saurì permez a nfurmazions y dac. "L ne sarà dessegur nia saurì davia che vel istituzions se à fat su n si sistem y ne ulerà nia l mudé" à spiegà l presidënt Durnwalder do la senteda dla Jonta provinziela. Purempò iel de bujën de unifiché i sistems a na maniera che i ne pierde nia de valor.
Chësta unificazion dëssa unì fata nchin ala fin dl 2014. Per finanzië i lëures à la Jonta provinziela dat pro de aumenté l capital dl sozietà SIAG de trëi milion de euro. La repartizion provinziela de nfurmatica ie unida nciarieda de lauré ora n cunzet de lëur che dëssa unì coordinà deberieda cun l'autra aministrazions publiches.
as
