Atualità
Delegazion dla Stiria mpera dal internet aslune dl Südtirol
USP – Per mparé a cunëscer co che vën purtà inant la rë dl internet aslune tl Südtirol à na delegazion dl ciamp economich dla Stiria n lunesc ai 12 de merz ancuntà l asssessëur provinziel Florian Mussner a Bulsan. Per i reprejentanc dal’Austria se tratovel dantaprima de mparé dal’esperienza tl Assessorat ai lëures publics ajache ëi ulëssa ënghe mëter a jì na tel rë.
Ti ultimi trëi ani vëniel tl Südtirol laurà dassënn per tache ite duc i luesc ala rë dl internet aslune. Te dut l raion provinziel iel unì metù roles y trat tres cabli de fibra otica. “Sce ulon che la jënt reste a viver y lauré nce ti pitli luesc da na pert ora, iel de mpurtanza fundamentela che i posse se taché ite ala rë mundiela de culegamënc” nscì l pensier de Mussner. Per chësta rejon se an tëut dant de arjonjer nchin ala fin de chësc ann duc i chemuns cun la rë de fibra otica.
Nce tla Stiria ulëssen fé su na rë de culegamënc internet aslune. Dan scumencé la planificazion di lëures à la delegazion de 15 persones de plu istituzions aministratives y economiches ulù mparé dal’esperienza che ie unida fata tl Südtirol. Per chësta rejon se à i reprejentanc dal’Austria ancuntà cun l assessëur Florian Mussner. Mparan a cunëscer plu avisa i lëures tla provinzia de Bulsan à l presidënt dl Cunsëi provinziel dla Stiria Franz Majcen, deberieda cun l presidënt dla Wirschaftskammer Josef Herk, mprenditëures y respunsabli dl Internationalisierungscenter Steiermark, dl Institut für Wirtschafts- u. Standortwentwicklung y dl Wirtschaftsbund dla Stiria cunstatà che la Provinzia de Bulsan se à tëut dant n travert ambiziëus.
L assessëur Mussner à prejentà la zifres de referimënt. Dal 2009 nchin śën iel unì metù ju feter 650 chilometri de roles y feter 560 chilometri de fibres otiches. “I 150 chilometri de roles che mancia mo y i 240 chilometri de fibres otiches unirà mo metui ju ntan chësc ann” sorissea Mussner, fajan nce referimënt al gran custimënt dla rë dl internet aslune. L assessëur à recunesciù la mpurtanza de stlarì i vares danora plu avisa, ajache la rë muessa unì sustenida da de plu pertes, dala Provinzia y dai chemuns, ma nce dala mprejes de telecomunicazion.
as
