Atualità
La Provinzia paia te tëmp de 25 dis
USP – La firmes che à fat lëures per la Provinzia de Bulsan muessa, do che l ie unì scemplificà la pruzedures, me plu aspité 25 dis che l ti vënie paià ora la contes. A chësta maniera ti juda la Provinzia a firmes che à dificulteies de licuidità finanziera.
Ntan l ann paia la Provinzia la contes te tëmp mesan de 25 dis. Autramënter iela al fin dl ann: "per via dl pat de stabilità dl Stat ne possel do mez nuvëmber nia plu unì paià contes y nsci muessa la firmes ala fin dl ann aspité nchin a feter doi mënsc" à spiegà l presidënt dla Provinzia Durnwalder tla cunferënza stampa do la senteda dla Jonta provinziela. La Provinzia ne possa sambën nce no paië ora canche l mancia documënc da pert dla firmes.
L presidënt dla Provinzia à ulù stlarì chisc tëmps de paiamënt do che Guviern a Roma ova metù a desposizion 40 miliardes de euro per paië ora contes a firmes che manacia de jì sun l cul.
as
