Atualità

Politica | 10.04.2013 | 12:54

Pest dla mendranzes al Dalai Lama per avëi cumbatù zënza viulënza

La persunalità dl Dalai Lama à (NCUEI) ai 10 de auril trat adalerch la mascima autoriteies politiches, istituzioneles y de dlieja tl palaz Widmann a Bulsan: per chësta si persunalità che se à daniëura mpenià per na soluzion dla mendranza dl Tibet zënza adurvé viulënza, ti à la Jonta provinziela sëurandat l pest dl Südtirol per la mendranzes.

"L ne ie nia saurì a cumbater per na mendranza zënza adurvé viulënza, ma la viulënza ne porta mei pesc" à dit Durnwalder ntan la zeremonia tl palaz Widman a Bulsan. L ie l terzo iede che la Provinzia sëurandà n pest per la mendranzes. Do l 2009 y 2011 iel chëst iede unì cris ora Tenzin Gyatso, l 14esim Dalai Lama per ti recunëscer si mpëni per la mendranza dl Tibet zënza adurvé viulënza. Ël à demustrà che l mpëni y tenì da si prinzipies a na maniera de pesc, porta fruc. "Na batalia per la mendranzes venciuda, ie chëla che cunësc me n vëncer da duta la pertes y deguni che à perdù" à dit Luis Durnwalder.

Ntan la zeremonia tl palaz provinziel à l cë spirituel, y nchin dan doi ani nce politich, di tibetans pià do l pest de 20.000 euro.
La mendranzes dl südtirol y dl Tibet à de gran derfrënzies, ma nce de plu cosses deberieda. Te si rujeneda, dan sëurandé l pest per la mendranzes, à l presidënt Durnwalder sorissà che i doi raions à dantaldut l mpëni y l se dé da fé per la mendranza deberieda. Tramedoi à cumbatù per dërc y per mantenì si identità. "Südtirol à abù la fertuna de pudëi se muever danter forzes democratiches che à lascià pro la streda dl'autonomia" à dit l presidënt dla Provinzia. Te d'auti raions ne ti vëniel nia dat tan de ahta ala mendranzes. L vester autramënter, nsci l presidënt, vën suvënz udù sciche pruvocazion che vën nce somëtuda.
Per nia respuender a chësta somëtuda da pert dla mendranzes cun viulënza, uelel vester persunaliteies stersces che viv dant la toleranza y l lascé vester la viulënza. L Dalai Lama ie na tel persunalità che à daniëura tenì sun diplomazia, sensibltà y bon cuer. "Vo sëis l miëur ambasciadëur dl nia adurvé viulënza" à dit l presidënt dla Provinzia.

L presidënt à nce sorissà che la mendranzes muessa se sustenì l'una cun l'autra, te chëla che n ie da ejëmpl. "Nosc model de autonomia ie n tel model, ajache l ie n ejëmpl de na batalia venciuda per arjonjer dërc dla mendranza" nsci Durnwalder.

L pest per la mendranzes da chëst iede, ie autramënter permez a chël che fova unì sëurandat al reprejentant di Gottscheer tla Slovenia, August Gril, y ala Union federala dl grupes etniches dl'Europa FUEV. La prima doi sëurandates à prutà pro a tré l nteres publich sun la mendranzes y si bujëns, ma tl cajo dl Tibet ie chësc bele dat. "La se trata chëst iede de mustré che nce d'autra mendranzes ti cëla cun nteres ala batalies di tibetans y per sustenì la maniera consecuenta de nia adurvé viulënza" à dit Durnwalder. Per la Provinzia de Bulsan se tratela de mustré su, tes l ejëmpl dl Südtirol, che l mpëni, l tenì permez y l tenì da si prinzipies tla gran crëta a nia adurvé viulënza se paia, ajache l ie n ejëmpli de na batalia venciuda.

L Dalai Lama à rujenà de n gran unëur a pudëi pië do l pest dla mendranzes dla Provinzia de Bulsan ajache l vën da na populazion che cura na gran amezizia cun i tibetans. La batalia di tibetans ie per na vëira autonomia, te chëla che i possa viver si capaziteies y si creatività. L Dalai Lama ie jit ite sun trëi vëtes a chëles che l ti à dedicà si vita. N iede l udëi ite che duta la persones ie unfat. "Ala fin dla finedes se mpënia duta la persones per na vita cuntënta" à dit l Dalai Lama, che à nce fat n apel de stlù la spana che ie danter rics y pueresc.

L segondo prinzip dl Dalai Lama ie l'armunia danter la religions. "Chësta armunia ne ie nia na utopia, ma te truepa pertes dl mond iela bele na realtà" nsci l Dalai Lama. Chësc ie puscibl ajache nce la religions à, ala fin dla finedes, i medemo obietives: l sustëni dl'amor, dla cumpascion, dla toleranza y dl respet.
La terza vëta ie la batalia per mantenì la cultura tibetana, che à si ravises tl Budism y a chëla maniera te prinzipies de nia adurvé viulënza y de pesc. (USP)

De plu fotos sun la plata facebook "Jonta dla Provinzia de Bulsan"