Atualità
Cunzescions dal strom: Jonta provinziela per na valutazion nueva
Na valutazion nueva dla documentazions de cunzescions sun la basa di documënc uriginei: chësta dezijion à la Jonta provinziela tëut (N SËIRA) ai 15 de auril. Tratatives cun duta la pertes nteressedes dëssa ntant purté a lascé vester i stritoc. Sun mëisa ie nce la puscibltà de dé ju cuotes dla SEL.
Davia che la Jonta provinziela ne ti l à danmesdì nia plu fata a traté la relazion dl espert nciarià Giuseppe Caia, iel (a una cun l’Associazion di chemuns) domesdì danter ëures unì tenì mo na senteda per traté la relazion y la valutazion di giurisć dla Provinzia. N iede à la Jonta provinziela detlarà drët tler de se destaché dal barat de documënc de dumandes per la cunzescions dal strom.
Sun la basa dla relazion de Caia y dla valutazion nternes à la Jonta provinziela nvià via de plu vares. La nciarierà i ufizies provinziei de cumpetënza per cuntroi dla dumandes de cunzescion, de valuté da nuef i documënc uriginei che fova unic dai ju per la cunzescions dal’ega per fé strom. I bënsteies de chisc ufizies dëssa mo dan che i vën tratei dala Jonta provinziela, unì cuntrolei da na cumiscion esterna de esperc. Sce da chësta valutazions ëssa da unì ora che n’autra sozietà à pità la miëura cundizions, tulerà la Jonta provinziela de reviers la cunzescion per ti la dé a chiche à pità miec.
La Jonta provinziela à nce la ntenzion de smëndrì si maiuranza tla SEL y tulerà perchël su tratatives cun i chemuns. N cajo pudëssa nce unì tëut n cunsciderazion la puscibltà de dé ora azions per la jënt. La ntenzion politica dla Jonta provinziela ie nce de finé via, tres tratatives, i stritoc per la cunzescions cun duta la pertes nteressedes a na maniera da ruvé a una dedora dala suneria. N relazion ala dezijions dla suneria che ie unides tëutes nchinamò n cont dl barat de documënc de dumanda, à la Jonta provinziela nciarià l’Aucatura de defënder i nteresc dla Provinzia a livel de dërt zevil. (USP)
as
