Atualità
Durnwalder: Napolitano vëir referimënt, respunsabltà per la Talia
“Giorgio Napolitano ie te chësc mumënt la persunalità politica de referimënt per majera pert di zitadins. On crëta che si mené y savëi ti jude al Paesc a unì dainora de na fasa drët sajiëula”: chësta ie la tëuta de posizion dl presidënt dla Provinzia Durnwalder do che Napolitano ie unì lità per n segondo iede presidënt dla Republica. Durnwalder rengrazia per si gran respunsabltà istituzionela y si vester de bon cuer cun chël che l à mo n iede metù si bon inuem y si autorità a servisc dla Talia.
Te na prima tëuta de posizion do che Napolitano ie unì lità n segondo iede, mostra Durnwalder sudesfazion che a Roma iel stat mesun unì ora dla stauscia politica. “Danz che chësc ie me stat mesun ajache l presidënt dl Stat se à mpomo metù a desposizion, metan sun na pert si programazions de vita persuneles y dajan si cuntribut per ti vester ala crisa tan sota” dij l presidënt dla Provinzia fajan referimënt ala situazion de stritoz danter i partic tla Talia. L se mostra che i partic ne ie nia stai bon de ruvé a na soluzion, scebën che la Talia ie te na crisa politica drët sota.
La dezijion de Napolitano de zapé ite mo n iede tl ciamp politich ie n ejëmpl de gran sapienza y snait. “Pudon ti vester recunescënc per chësc” à dit l Presidënt dla Provinzia. Bele tla legislatura passeda ie Napolitano sta n pont de referimënt zentrel per zitadins, istituzions a livel talian y nternaziunel. “Ël ti à sapù da mantenì n pue’ de credibltà per la Talia” spiega Durnwalder, che spera che chësta vela de Napolitano gëure na streda per ruvé prësc a mëter sun Guviern che arà l duvier de ruvé ora de chësta situazion fërma y de ti jì permez ala gran cuestions economiches, politiches y sozieles. “Mo les sburdlé ora, fossa fatal” stluj ju Durnwalder. (USP)
as
