Atualità
Program dla Jonta provinziela nchin ala fin dla legislatura
Per l ultimo mez ann che resta mo de chësta legislatura se à la Jonta provinziela (NCUEI) ai 22 de auril tëut dan n program de plu prupostes de lege y decrec. I argumënc prinzipei reverda la sanità, i cuatieres, l’urbanistica, l’energia, l’economia y l personal de scola.
Te na lege omnibus dëssel unì purtà inant de plu cuestions. L presidënt Durnwalder à riesc do la senteda dla Jonta rujenà dl ciamp dla sanità ulache la se trata de adatamënc d'urganisazion y de nfurmatica damandei dala Union Europea. Tl plann dla sanità dëssel unì udù dant la cumpetënzes prinzipeles de uni spedel dl Südtirol. N cont dla manifestazions publiches uel la Jonta provinziela finé via la cuestion dla segurëza ti sëuradajan cumpetënzes ai chemuns. Doi prupostes de lege che ie bele dates pro dai assessëures provinziei reverda l model de "sparani per n cuatier" y la reforma dla lege urbanistica. N cont dla plann de svilup y de prugramazion urbanistica LEROP à l presidënt dla Provinzia cunedì che la dura massa giut per pudëi ruvé a na cuntlujion, ma che n anjenierà n dessëni de lege.
N argumënt de gran atualità ie l'energia: ntan i sies mënsc de legislatura che resta mo uel la Jonta provinziela lauré ora na mudazion ala lege sun la sëurandata dla cunzescions dal'ega per fé strom. "La sozietà SEL ne dëssa nia plu avëi la maiuranza tla singula sozieteies, patrones dla cunzescions" à dit l presidënt Durnwalder. Aldò dl presidënt dëssel unì laurà ora criteries nueves per sëurandé la cunzescions aldò de chëi che l referimënt ambientel arà manco mpurtanza y la sëurandata dependerà dantaprima dal priesc pità, nsci sciche udù dant dal Guviern Monti.
Per sustenì l ciamp economich y de cunseguënza nce miuré la pusciblteies de siteres, à la Jonta provinziela udù dant na lege omnibus che reverda l'economia. Criteries nueves dëssa unì laurei ora per i cuntribuc ai pendolares. Trëi ponc reverda i nsenianc de scola. Na soluzion val de bujën per nsenianc che fej bele dai ani suplënzes y ne à nia na stiera segura. "Per nsenianc dla scoles y dla scoles prufesciuneles val de bujën de na unificazion dla regules da pont de ududa giuridich y economich" à dit Durnwalder.
as
Galaria dales fotografies
Il Presidente Durnwalder illustra le priorità prima della conclusione della legislatura
- Scarica il file audio 1096 kb
