Atualità
N program radio me per la RAI Tudëscia y Ladina
Sun l radio dla RAI de Bulsan puderan prësc me plu audì la trasmiscions tudësces y ladines. La trasmiscions talianes da tlo jirà sun i canai naziunei. Cun l program radio à la Jonta provinziela (NCUEI) ai 06 de mei dat pro la prima pert dla cunvenzion nueva per la RAI de Bulsan.
I programs radio y televijion dla RAI per la mendranza tudëscia y ladina tl Südtirol ie nchinamò unic finanziei tres na cunvenzion speziela danter la RAI y la Presidënza dl Cunsëi di Ministri. Aldò dl'Acurdanza de Milan se sëurantol la Provinzia de Bulsan chësc custimënt de feter 20 milion de euro. Tla cunvenzion nueva per la RAI de Bulsan (2013-2015) iel nce udù dant n aumënt dl tëmp de trasmiscion per la pert tudëscia y ladina.
La Jonta provinziela à śën dat si bënsté sun la prima pert dla cunvenzion nueva che reverda l radio. Da mesa la set da duman nchin ala diesc da sëira saral sun l canal de Bulsan me plu da audì trasmiscions tudësces y ladines. La pert ladina sarà de mes' ëura da mesdì (13:30 - 14:00) y mes' ëura da sëira (19:00 - 19:30). Nchinamò jiva la nutizies ladines nchin do la doi. La pert ladina che unirà scurteda ntan l'ena unirà fata do la dumënia. De ndut aumënta l'ëures de trasmiscion radio per tudësch y ladina da 4716 a 5300 ëura al ann. "Ncuei ons dat pro l program dl radio, per l'ena che vën iel bele fat cont de muever cun la trasmiscions" à dit l presidënt dla Provinzia Durnwalder.
N cont dla prugramazion de televijion ne iesen mo nia ruvei a na dezijion. L presidënt dla Provinzia à cunedì che per la pert ladina iel udù dant de majera mudazions. Sëuraprò ala trasmiscion Trail che ie bele, uniral dala 22:00 fat na segonda edizion che dura diesc menuc. La redazion ladina giaterà plu autonomia de lëur y plu culaburadëures.
La nuviteies plu avisa n cont dla RAI Tudëscia y Ladina unirà fates al savëi proscimamënter te na cunferënza stampa. (USP)
as
