Atualità
Trëi chemuns de Sëuramont da Durnwalder y Mussner
Na delegazion di trëi chemuns ladins storics de Belun se à (NCUEI) 08 de mei ancuntà cun l presidënt dla Provinzia Luis Durnwalder y l assessëur ladin Mussner. I argumënc dl’ancunteda tl palaz Widmann a Bulsan ie stai la ulentà di trëi chemuns storics de fé pert dl dla provinzia de Bulsan, i finanziamënc tres l fondo Brancher y l svilup dla RAI Ladina.
Acioche i trëi chemuns Cortina, Fedom y Col Santa Lizia posse deventé pert dl Südtirol iel de bujën de purté inant la pruzedures a Roma. La delegazion di trëi chemuns cun l ambolt de Fedom Ugo Ruaz, l cunselier Ilario Dariz, l vizeambolt de Col Paolo Frena y l assessëur de Cortina Stefano Verocai à damandà l sustëni da Durnwalder y Mussner acioche la Region Trentin-Südtirol y l Cunsëi provinziel de Bulsan debe n bënsté positif. Ma dan che la possa ruve a chësc bënsté muessa la pruzedures jì inant a Roma. "Tlo saral de bujën de tò su cuntat cun l presidënt di ministri Enrico Letta, l minister ala regions Graziano Delrio y cun i presidënc dl Senat y dla Camera" à dit Durnwalder fajan nce referimënt ai parlamenteres Zeller y Alfreider per cumpanië la tratatives a Roma.
"Acioche l Cunsëi provinziel de Bulsan posse dé si bënsté muessel n iede unì la dumanda da Roma, perchël se tratela śën n iede iló de purté inant la tratatives" sorissea l assessëur ladin Florian Mussner. Tl referendum dl 2007 à i trëi chemuns storics mustrà na ulentà tlera de ulëi fé pert dla provinzia de Bulsan: "La ulentà dla populazion muessa unì respeteda, ma l muessa nce unì tenì cont dla normes giuridiches y la ndicazions dl pachet" à dit Durnwalder.
Aldò dl presidënt dla Provinzia iel tler che la se trata cuncretamënter nia de plu chemuns dl Belun, ma me di trëi chemuns ladins storics. "Cun Cortina sons liei da na storia de passa 400 ani, cun Fedom y Col nchinamei da passa 1000 ani, chësc demostra drët tler che on la medema ravises" à dit Durnwalder. L presidënt dla Provinzia y l assessëur ladin à segurà che si posizion resta per i trëi chemuns de Sëuramont.
Per mantenì l cuntat cun l Südtirol y l raion ladin dla Dolomites à la delegazion di trëi chemuns de Sëuramont damandà miuramënc n cont dla RAI Ladina. Da pont de ududa tecnich se tratela di culegamënc per udëi miec la televijion ladina y per audì miec l radio ladin. Ma nce a livel de cuntenut ulëssa i trëi chemuns na majera cunsciderazion da pert dla RAI de Bulsan. Per i cumëmbri dla Jonta provinziela de Bulsan pieta la cunvenzion nueva danter Provinzia, RAI y Stat la puscibltà de tenì cont di chemuns de Sëuramont.
La pusciblteies de finanziamënc tres l fondo Brancher ie stat l terzo pont dl'ancunteda a Bulsan. Chësc depënd śën dal Guviern nuef a Roma. "Nëus tenion pra nosta posizion che i 40 milion che vën da Bulsan dëssa me unì adurvei per chemuns che va a sëida cun la provinzia y chisc ie chëi de Belun y de Sondrio" à dit Durnwalder. (USP)
as
