Atualità
En forza dai 15 de mà la lege sön les lîtes provinziales nöia
En mertesc, ai 14 de mà vëgnel publiché sön le Boletin Ofizial dla Regiun la lege che regolamentëia les lîtes dl Consëi provinzial. La lege nöia va en forza le dé do, en mercui ai 15.
La lege provinziala n. 5 di 8 de mà se referësc ales "'Desposiziuns sön la lîta dl Consëi dla Provinzia autonoma de Balsan por l'ann 2013 y sön la composiziun y formaziun dla Junta provinziala''. Ajache al n'é nia gnü dè jö domandes de referendum ćina le terminn de trëi mëisc dala pröma publicaziun dl test, vëgn la lege sön les lîtes provinziales nöia publicada en mertesc, ai 14 de mà sön le Boletin Ofizial n. 20 dla Regiun y va en forza le dé do la publicaziun, en mercui, ai 15.
Danter les novitês plü importantes che vel bele por les proscimes lîtes él la usc por corespondënza por les südtirolejes y i südtirolesc che vir foradecà, la limitaziun de trëi mandać por i componënć dla Junta provinziala y le dovëi da ne superè nia i 40mile euro por candidat por la campagna litala. Por lege él preodü na cuota de jëne che scrì dant le limit de lista di dui terzi por i candidać dl medemo jëne. Tl dagnì ne podarà la Junta nia ester metüda adöm da plü co 9 componënć (le presidënt dla Provinzia y alplü 8 assessurs/assessuries).
Les litadësses y i litadus dl Südtirol lîta en domënia, ai 27 d'otober dl 2013 le Consëi provinzial nü.
usp
