Atualità
Autonomia y manco burocrazia: Mussner dal Minister Orlando
Lascé lauré cun manco burocrazia, soluzions pragmatiches y l respet per l’aministrazions autonomes: chësc se à l assessëur al ambient Florian Mussner (NCUEI) ai 14 de mei damandà dal minister al ambient Andrea Orlando. L’ancunteda a Roma ie stata ucajion dl prim cuntat persunel danter la Jonta proviinziela de Bulsan y l Guviern talian nuef.
L minister Andrea Orlando à purtà dant trëi ponc prinzipei de si mandat: co che vën nuzà l raion, l'ega y l sistem de straufonghes per chi che ne respetea nia l ambient. Te si rujeneda dan ai representanc istituzionei dla regions y dla provinzies autonomes, à l minister sorissà la mpurtanza dla culaburazion y de tré ite nce la posizions dla regions.
Propi de chësc viers se à l assessëur Mussner damandà plu respet per l'aministrazions autonomes, do che l Guviern da dant ne à nia recunesciù de plu cumpetënzes. "Me ei damandà plu respet per l'Autonomia y che nes vënie nce lascià chël che nes spieta per rejon" à dit Mussner.
Florian Mussner à mplu damandà che l Guviern nuef judé l'aministrazions regiuneles a lauré plu saurì. "Sce l ne sarà nia mesun giapé finanziamënc per realisé lëures per l ambient, dëssel amanca unì smëndrì la burocrazia per fé chisc lëures" à dit Mussner a Roma. Per l assessëur ladin che à nce la cumpetënza dl ambient, iel de bujën che l vënie metù a jì na streda giuridica sun chëla che n possa nce mëter n drova soluzions pragmatiches. Chësc n referimënt ala chëuta nueva TARES y ala regules per l refudam speziel SISTRI.
Per lëures ambientei de segurëza à Mussner damandà finanziamënc che ne muessa nia respeté l pat de stabilità. (USP)
as
