Atualità
Ngrandì l servisc meteo-ladin
Sëuraprò ala previjions meteo per dut l Sudtirol vëniel śën nce pità l tëmp da mont tla rujeneda ladina. Sun pruposta dl assessëur ladin Mussner se à i metereologhes y la tradutëures dla Provinzia, (N SËIRA) ai 21 di de mei, tëut dant de slargë ora l servisc meteo dla Provinzia de Bulsan a dut l raion dla cin valedes ladines dolomitiches.
Do mez ann che l ie unì nvià via l servisc meteo tla rujeneda ladina, ie chësc servisc śën nce unì slargià ora ala previjions dl tëmp sa mont. Nfati possen al’adres www.provinzia.bz.it/meteo-ladin, tla rubrica “tëmp sa mont”, udëi la previjions dl di y chëles dl di do per i raions da mont. Te na grafica speziela vëniel cun n simbol nce prejentà la previjions per la montes tla Dolomites.
L assessëur provinziel ladin se à damandà che l vënie nce laurà per pudëi prejenté la previjions meteo de dut l raion ladin, nce per la valedes de Sëuramont che ne fej nia pert dla provinzia de Bulsan. I metereologhes dl ufize idrografich y la tradutëures dl ufize cuestions linguistiches se à tl’ancunteda ai 21 de mei tëut a cuer chësta nuvità che à nce l fin de valorisé la mendranza ladina. Danter i servijes dla Provinzia ie chël dl meteo l plu nuzà dala jënt. “La previjions dl tëmp per duta cin valedes ladines fossa n messaje sterch de union ladina” à dit Florian Mussner, sorissan che dan mudé la sëides uelel vester la union dla persones.
Te nia cis sies mënsc ie la nfurmazions meteo per ladin unides tlichedes passa 10.000 iedesc. “Tenian cont dla cumpëida de jënt che rejona ladin ie chësc drët n bel resultat” à dit la diretëura dl’Ufize idrografich Michela Munari. Te chësta prima ancunteda di metereologhs y dla tradutëures à l assessëur ladin rujenà de n bujën che ie unì curì drët bën cun n lëur de grupa. “L servisc meteo pieta prejënza dla mendranza ladina y chësc ie drët nscila, ajache on i medemi dërc y l ie drët i fé valëi” à dit Florian Mussner. (USP)
as
