Atualità
Mussner lauda l spirt de union dl Festival Junëza
Canche n sada y dumënia, 15 y16 de juni, se ancunterà jëuni dla cin valedes tl prim festival inerladin la junëza, uniral fat n var de gran valor per la union ladina. “I ladins dla cin valedes ie ujins che se anconta puech danter ëi, i jëuni ie stai boni de pité n festival dl’ancunteda y chësc dà crëta per l daunì” sorissea l assessëur ai jëuni ladins Florian Mussner.
Mo mei ne iel unì metù a jì mumënc ulache i jëuni de Badia, Gherdëina, Fascia, Fedom y Ampezo possa viver si nteresc deberieda. L “Festival Jonëza” a Corvara pieta ntan l fin dl’ena na lingia de ativiteies che va dala mujiga, al’teater, ert y sport te formes atratives per i jëuni. “Te chëla che i jëuni possa ntan l festival viver si pascion per la mujiga y per la truepa ativiteies se devertian deberieda, vëniel a se l dé mumënc de ancunteda y chësc ie de gran valor per la mendranza ladina” mët a cuer l assessëur Mussner che fej referimënt al gran bujën de miuré i cuntac danter i ladins che vif tla cin valedes dla Dolomites. “I jëuni à abù la ulentà de purté adum i jëuni dla cin valedes y ie cun l festival nce stai bon de la mëter a jì. Chësc ie dassënn da stimé ajache chësc festival à duta la cualiteies per deventé na funtana de ancunteda, de cuntac y de barat danter i ladins nce per i ani che vën” se ncunforta l assessëur provinziel cun ncëria per i jëuni ladins. Sëuraprò a pité n avenimënt per i jëuni sorissea Mussner nce doi fazions per n tëmp plu lonch: “Per la mendranza juda l festival a miuré i cuntac danter i ladins dla cin valedes, ai jëuni ti dal rejon de se identifiché mo de plu cun nosc ncësa.”
N sada y dumënia ti vëniel ai jëuni pità cunzerc, bai, bodypainting, teater, fotografia, leteratura, n turnoi de juech al palé, orienteering, arpizeda y mo truep juesc. Dumënia domesdì saral a Corvara nce na pert spirituela cun na santa mëssa zelebreda dal vëscul. L program ie publicà sun www.festivaladesladines.com tl internet. Per l festival vëniel nce pità n servisc de curieres per furné deberieda a Corvara y de reviers. (USP)
as
