Atualità
Sëualuech provinziel pra la smueia de Dantercëpies
Deberieda cun i tecnics dla Provinzia, l ambolt de Sëlva y i respunsabli dal furnadoia Dantercëpies se à l assessëur provinziel Pichler Rolle fat n cheder dla situazion sun Dantercëpies ulache l fova unì ju na majera smueia. Nchin ala sajon da inviern dëssa purtoi y furnadoia vester anjeniei. Mo n sëuraluech per abiné la miëur soluzion.
La situazion sun Dantercëpies do la gran smueia ie dut auter che scëmpla. Davia che l assessëur Pichler Rolle à giapà la ncëria de coordiné la pruzedures de proietazion y apruvazion per la furnadoia nueva y di purtoies, al nstës ulù se fé n cheder dla situazion.
La furnadoia y i purtoies de Dantercëpies à na gran mpurtanza nia me per la valeda de Gherdëina ma per duta la Sellaronda. Perchël se tratela de purté inant i vares burocratics acioche i lëures possa unì fai per tëmp, do che la smueia à purtà sotsëura i programs de frabiché. L Chemun de Sëlva à bele purtà ite la trassa dla furnadoia nueva tl plann urbanistich. Śën mancel mo undesc vares burocratics: l ejam de cumpatibltà ambientela, purté ite tl plann provinziel dai lifc, bënsteies geologics y n.i..
Tla vijita dl raion de Dantercëpies ie l assessëur Pichler Rolle unì cumpanià dal ambolt Peter Mussner, l cunselier de aministrazion Franz Perathoner, Adriano Oggiano dl ufize provinziel per la cuntreda, l vizecumandant di destudafuech Anton Mussner y diretëur dla sozietà Dantercëpies Giovanni Pasti. "Sun la basa dla situazion particulera, muessel vester mesun purté inant duta la pruzedures burocratiches te tëmp da record" à dit Pichler Rolle. Dan la smueia fova duta l'autorisazions bele a post, do la mudazions iel unì fat n program te chël che la Provinzia, l Chemun y la sozietà lëura te na culaburazion drët strënta.
Tl sëuraluech an udù l bujën de plu lëures de ressanamënt n cont de eghes, bosch, stredes da ruve permez y dl purtoi dai schi. A una cun l presidënt Durnwalder iel per l'ena che vën unì prugramà mo n sëuraluech cun i respunsabli di ruves da mont, la prutezion zevila y i tecnics per la defendura dla cuntreda. L fin ie de abiné deberieda la miëura soluzion per mëter a post dut l raion. (USP)
as
Galaria dales fotografies
