Atualità
De viers dla capitela culturela: mostra tl Museion
Te chëla che la dezijion sun i candidac per deventé capitela culturela 2019 ruva n var al iede for plu daujin, à l assessëur Tommasini (N SËIRA) ai 13 de juni giaurì la mostra "Step by Step 2019" tl Museion a Bulsan. Te chësta ucajion iel nce stat n barat cun la concurëza da Ravenna y Matera.
Nchin ala dumënia che vën, 16 de juni, sarà tla Museion-Passage da udëi i proiec che à venciù i cuncorsc de ideies per la candidatura a capitela culturela europea. I cuncorsc ie unic metui a jì dala Provinzia, la Camera de Cumerz, la Confcooperative y la lianza dla cooperatives per sculeies, lies y cooperatives. L fova unì damandà proiec che cumpanieia la candidatura dl Sudtirol cun Unieja y l nordest dla Talia per deventé capitela culturela 2019, cun l moto de lië cultura, economia y l plurilinguism.
Pra la giaurida dla mostra à l assessëur Tommasini propi sorissà chisc aspec metan a cuer che iust tla crisa economica vëniel recunesciù la cultura sciche motor de svilup per duta la cumenanza y che la va de la sustenì.
La funzion da puent danter nord y sud, l cunviver dla grupes de rujeneda tl Sudtirol y l barat cun i ujins tl nordest dla Talia tla funzion da region europea, ie stat un di aspec che Tommasini à sorissà tl barat cun i cuncurënc da Matera y Ravenna. L Museion à nce pità ucajion de audì la strategies de candidatura da pert de Ravenna cun Alberto Cassani y da pert dla zità de Matera cun l cuordinadëur Nicola Trombetta. (USP)
as
Galaria dales fotografies
Mostra di proiec che à venciù i cuncorsc de ideies - capitela culturela europea (foto: USP/ohn).
Aria da capitela culturela tl Museion: (d.m.c.) Nicola Trombetta, Patrizia Trincanato, Alexander Prinoth, Christian Tommasini y Alberto Cassani (foto: USP/ohn).
