Atualità
Streda de Rina: scumencià l’ultima pert lëures
Chisc dis scumëncia i lëures per l terzo y ultimo lot dla streda de Rina. Chësc ntervënt de 7,3 milion de euro ie l majer lëur da chëst ann dl assessorat provinziel ai lëures publics tla valedes ladines. “Na miëur’ streda per Rina ie sciche na vëina acioche l luech posse se mantenì y se svilupé” sorissea l assessëur Florian Mussner.
L terzo y ultimo lot per miuré la streda de Rina reverda la pert suinsom nchin pra dlieja. Ti ani passei iel bele unì fat la prima doi pertes dla streda scumencian japé pra la Gran Ega. "Sun la vedla streda se stentova i auti dassënn a passé via n camion o na curiera, perchël fovel gran bujën de miuré la streda de Rina a na maniera che l luech giape de miëura pruspetives per l daunì" spiega l assessëur Florian Mussner.
Do avëi sotscrì l cuntrat, scumëncia la firma Oberosler da San Laurënz chisc dis a anjenië l cantier. L terzo lot mesura passa doi chilometri y ie unì mpartì te pitli toc da 400-500 metri. "L unirà laurà sun de pitli toc al iede a na maniera che n possa prësc fé amanca n asfalt provisor y passé plu saurì" spiega l diretëur di lëures Gustav Miscì. Ntan i lëures ne iel nia udù dant deviazions, i autri puderà passé aldò de n semafer. Tl'ëures de majer muvimënt, da duman y da mesdì vëniel cialà de mëter a jì pauses, a na maniera da garantì na miëur viabltà.
Aldò dla proietazion, fata internamënter tl Assessorat ai lëures publics, uniral slargià la streda a na larghëza de ndut 5,5 metri. Te de plu lueges saral nce de bujën de splané la streda y da ngrandì la raides. Chisc ntervënc se damanda passa vint mënsc de lëur. Davia che ntan i mënsc plu frëic ne uniral nia laurà iel da fé cont che i lëures durerà feter doi ani. L custimënt dl terzo lot dla streda nueva de Rina ie de 7.341.650 euro y vën defin curì dala Provinzia de Bulsan. (USP)
as
