Atualità
Provinzia tol la streda dla software liedia: mudazion per 7000 computer
Baratan dai programs de computer “MS Office” a "LibreOffice" fej l’aministrazion publica dl Sudtirol l prim gran var per la software liedia. Ntan i proscimi trëi ani fej me la Provinzia mudazions pra 7000 computer, sparanian a chësta maniera feter 600.000 euro de lizënzes.
La software liedia ie bele unida tëuta ite dan 20 ani tl'aministrazion publica, ma la ne se à nia drë drucà tres. Śën vën chësc mudà. Duta l'aministrazions publiches dl Sudtirol lëura da śën inant cun l pachetl de programs "LibreOffice" mpede cumpré la lizënzes "MS Office" dala Microsoft. Me tla Provinzia uniral ti proscimi trëi ani baratà programs pra 7000 computer, leprò vën milesc de computer ti chemuns y tl'Azienda Sanitera.
"Cun la ntroduzion de software liedia per aplicazions standard se tratela sambën n iede de sparanië custimënc, ma nia me: cun la software liedia deventons plu flessibles y chësc ie iust te n ciamp che se muda tan riesc, sciche chël dla nfurmazion tecnologica, da gran mpurtanza" spiega l assessëur ala nfurmatica Roberto Bizzo.
La nuvità ie unida prejenteda (NCUEI) ai 20 de juni dal assessëur provinziel Bizzo, deberieda cun l diretëur dla repartizion nfurmatica Kurt Pöhl, l espert de software liedia dl TIS Patrick Ohnewein y Erwin Pfeifer di sindacac. Iust i sindacac se ova fat inant per la ntroduzion de software liedia tl'aministrazion publica per sparanië custimënt.
De fauré fovel unì metù su na grupa de lëur cun esperc dl TIS deberieda cun la Provinzia, i chemuns y l'Azienda Sanitera per la ntroduzion dla software liedia y per mëter a jì n barat de datesc danter la defrënta aministrazions. L resultat ie na ntroduzion n var al iede scumencian cun "LibreOffice". L ie nce unì fat ora che l format ODF dëssa unì adurvà sciche format standard per se baraté documënc y l tëmp de trëi ani per fé la mudazions ai computer.
Aldò dl diretëur de repartizion Pöhl iel me tla Provinzia dassëula, 200 pachetli de software defrënc che muessa unì adatei. Chësc cumporta n gran mpëni y possa perchël me unì fat te tëmp de plu ani. Cun la ntroduzion de programs nueves per lauré sun tesć, prejentazions y calculazion de tabeles, ne saral mo nia na fin dl custimënt per la lizënzes. "Nce do la migrazion ne jirala nia defin zënza MS Office, ajache vel programs spezifics ie stizei lessù. Aldò dl'esperienza dla zità de Minca, dëssel vester mesun smëndrì l bujën de MS Office a me plu puec cënc de lizënzes. Minan de pudëi fé la medema sperienza, vëniel fat cont de pudëi sparanië feter 600.000 euro de lizënzes te tëmp de trëi ani.
Aldò di esperc dla repartizion de nfurmatica ne saral nia saurì a fé la mudazion. L sarà de bujën de na bona comunicazion, de anjenië i culaburadëures a adurvé i programs nueves y tl prim tëmp nce di cumpanië. Chësta pert de lëur cumporta nce l majer custimënt. Pöhl fej cont che ntan i prim doi ani cuer l custimënt dla mudazion l sparani dla lizënzes y che l vëir sparani sarà permò da udëi do trëi nchin a cater ani. (USP)
as
Galaria dales fotografies
