Atualità
Veles provinzieles 2013: Jonta dà pro ndeniteies
L’urganisazion per la veles provinzieles ala fin de utober 2013 va inant a var plën. (NCUEI) Ai 24 de juni à la Jonta provinziela fat ora la ndeniteies per i chemuns y i presidënc dla sëntes de vela. Leprò ala nce metù a desposizion i mesuns per la vela tres lëtra, che unirà tenida per l prim iede.
Pra l ultima veles, dl 2008, à i zitadins dl Sudtirol che vif oradecà pudù de jù si stima per la veles provinzieles, ma me sce i ie unic a cësa tl Sudtirol. “Dan cin ani ons perchël paià ora l custimënt de viac” à dit l presidënt Durnwalder tla cunferënza stampa do la senteda dla Jonta. Chësta forma de partezipazion à nce abù si custimënt. “De chëi de Sudtirol che vif oradecà à dl 2008 lità 5000, y chësc à cumpurtà n custimënt de feter doi milion de euro” à spiegà l presidënt dla Provinzia.
Cun la lege de vela nueva, vëniel chëst ann per l prim iede pità la puscibltà de lité tres lëtra. A chësta maniera dëssel vester plu saurì a fé pea la veles y tl medemo mumënt vëniel nce sparanià scioldi publics. “Fajon cont cun n custimënt de feter 450.000 Euro, che ie n gran sparani” à dit Durnwalder. De ndut ie atualmënter feter 24.000 zitadins dl Sudtirol registrei tl AIRE, l albo de chëi che vif oradecà. A chësta maniera ai l dërt de de ju si stima ai 27 de utober.
La Jonta provinziela à nce dat pro na lingia de d’autri custimënc per la veles provinzieles. Ala Assoziazion di chemuns dl Sudtirol uniral paià ora na ndenità de 9500 euro, i chemuns giaterà duc 2424 euro cun leprò 2,08 euro per uni zitadin che à l dërt de lité. Per i presidënc dla feter 400 sëntes de vela à la Jonta provinziela dat pro na ndenità de 200 euro (USP).
as
