Atualità
Azetà la trassa nueva per Dantercëpies – pruzedura da record
I presuposc urbanistics y de tecnica ambientela per la trassa nueva dla furnadoia de Dantercëpies te Sëlva ie anjiniëi. La Jonta provinziela à azetà la mudazion al plann urbanistich y la valutazion de dann ambientel.
"La Provinzia de Bulsan à tëut pruvedimënc straurdineres per na situazion straurdinera: me puecia enes iel unì purtà inant 13 pratiches aministratives per mëter a jì che la furnadoia - sce dut va bën - possa d'inviern inò jì n funzion" spiega l assessëur Elmar Pichler Rolle, che fova unì nciarià dala Jonta provinziela de coordiné la pruzedures straurdineres.
Aldò dl assessëur iel stat na gran culaburazion de chiche muessa tò na dezijion. "La sozietà dla furnadoia se à prësc dat da fé, la à lascià lauré ora n proiet de varianta, l Cunsëi de Chemun de Sëlva à te me trëi enes do la gran smueia azetà la mudazion al plann urbanistich y śën ie la pruzedures stlutes ju", laudà Pichler Rolle.
Na recunescënza ti va al'aministrazion chemunela y a duta la populazion de Sëlva: "L mpëni y la culaburazion meneda dal ambolt Peter Mussner fej ejëmpl. Son perchël de chëla che n ti ie ala cunseguënzes dla smueia. I lëures che ie mo da fé ie dassënn granc y l pudëi giaurì la furnadoia ie na batalia contra l tëmp. Da pert dla Provinzia uniral fat dut l puscibl per sustenì Sëlva", sorissea Pichler Rolle.
as
