Atualità
Mostra “Teramënter” ai 12 de lugio tl Istitut Ladin
Cun la daurida de “Teramënter” scomëncia en vëndres, ai 12 de lugio na linia de cin mostres artistiches da d’isté tl Istitut Ladin Micurà de Rü a San Martin de Tor y öna tla sala dla Lia Mostra d’ert a Urtijëi. Pro la pröma mostra él da odëi laûrs de Irina Tavella y Roberto Pallestrong.
Irina Tavella vir y laôra a Al Plan, à imparè l’ert da laurè cun ceramica a Faenza. Chësta ert é por l’artista (1973) na inrescida y na sperimentaziun zënza fin. Tres indô prôra da i dè formes y corusc nüs a sües creaziuns.
Roberto Pallestrong (1968) vir y laôra a Badia, é n autodidat tl’ert da laurè la ceramica. La fontana d’ispiraziun prinzipala por la creaziun de sües operes é les formes y i corusc dla natöra.
Pro la daurida da en vëndres, ai 12 de lugio dales 18.00 tla sënta dl Istitut Ladin Micurà de Rü saràl da aldì n’introduziun de Katharina Moling y parores de salüt dl presidënt y dl diretur dl Istitut Ladin Albert Videsott y Leander Moroder. Da cornisc fajaràl na performance musicala cun bal de Max Castlunger y Cristina Cau.
La novité dles mostres da d’isté de chësc ann é che cater mostres gnarà metüdes a jì dal Istitut Ladin Micurà de Rü y dal EPL – Ert por i Ladins a San Martin de Tor y öna gnarà tignida en colaboraziun cun le Circolo - Lia Mostra d’ert a Urtijëi. Do la mostra „Teramënter“ jarà la seria de mostres inant ai 26 de lugio cun i laûrs de Giancarlo Lamonaca tla mostra “Nubi”. La terza mostra „Por le momënt nia da abiné“ de Fabian Feichter gnarà daurida ai 9 d’agost. Les mostres tl Istitut gnarà stlütes jö cun l’esposiziun “Na vita por l’ert” de Lois Irsara che gnarà daurida ai 23 d’agost. La mostra tla Lia Mostra d’ert de Barbara Tavella”Uncutted” sarà da odëi dai 13 de setëmber inant.
An podarà jì a ti ćiarè ales mostres dal lönesc ala sabeda dales 10.00 ales 12.00 y dales 16.00 ales 19.00 y la domënia dales 10.00 ales 12.00. La mostra “Teramënter” sará da odëi ćina ai 22 de lugio. (USP)
as
