Atualità
Realisé urć da d'invern devënta plü scëmpl
Al devënta plü scëmpl realisé urć da d'invern. Ai 8 de lugio (Inier) à la Junta provinziala dit de scê a na proposta dl assessur Elmar Pichler Rolle che vëiga danfora che tl dagnì ne mëssel nia plü gnì desmostrè la dorada dl'iradiaziun dl sorëdl, mo l'esposiziun cuntra süd é determinanta.
Inier à la Junta provinziala tut la dezijiun che por realisé n urt da d'invern ne val nia plü debojëgn da desmostrè che „ai 23 de dezëmber é l'iradiaziun dl sorëdl de almanco trëi ores". Aladô dla regolamentaziun nöia mëss l'urt da d'invern ester ot cuntra süd cun l'amisciun de na toleranza de desviaziun de 60 degrà.
L'assessur Pichler Rolle, che à bele tl passè scemplifiché na ligna de provedimënć aministratifs, por ejëmpl por fà sö de te' pici tiac o por instalè tancs dal gasöre dij:"I messun en linia de prinzip scemplifiché a livel burocratich l'atuaziun dles mosöres che à albü faziun y chësta coreziun che reverda i urć da d'invern, fata fora cun le Consëi di Comuns, é n ejëmpl de chësc vers".
La mosöra che scemplifichëia la realisaziun de urć da d'invern jarà tosc en forza cun decret dl Presidënt dla Provinzia. L'assessur Pichler Rolle à lascè alsavëi che te n valgönes edemes portaràl dant ćiamò n valgönes d'atres scemplificaziuns.
usp
