Atualità
Trëi studi per garantì segurëza sun la streda de Frea
Per abiné na soluzion realisticia acioche n possa nce d’inviern passé uni di l jëuf de Frea iel tl Assessorat provinziel ai lëures publics unì laurà ora trëi studi. L assessëur Florian Mussner i à prejentei ai ambolc de Corvara y Sëlva.
I tecnics dla stredes à studià co garantì la segurëza sun la streda de Frea canche l ie pericul de levines y che l vënie ju sac. De chisc studi iel unì ora trëi prupostes cuncretes: fé n majer tunel, spusté la streda ti prei de Frea o fé cater ntervënc plu mirei. Tl’ancunteda dl assessëur Florian Mussner cumpanià dal diretëur de repartizion Valentino Pagani, cun i ambolc Peter Mussner y Robert Rottonara iel unì ora che la prima doi ideies cumpurtëssa n majer dann ambientel sibe n cont de cuntreda, che nce per la funtanes dl’ega da bever per Sëlva.
I trëi aministradëures ie stai a una che la soluzion plu realisticia fossa de fé trëi tettoies ti ponc plu critics y n parëi contra sasc y levines. Aldò di tecnics curissa chisc ntervënc 85 percënt dl toch plu critich, sot a Murfrëit, che mesura feter doi chilometri. “Chisc lëures pudëssa unì fai te cater loc y unissa a custé feter 20 milion de euro” spiega l assessëur Mussner.
L ambolt de Sëlva à purtà la pruposta de spusté la streda itinsom l toch plat a na maniera che la fossa plu dalonc dal crëp. Chësta idea unirà śën analiseda n cont de fatibltà y custimënt dai tecnics dla stredes.
I studi dla Provinzia ne reveda nia me la soluzions, ma nce la situazion nstëssa. “Ti ultimi 15 ani ie l Jëuf de Frea stat sarà 195 dis, che fej ora na media de 13 dis al ann. Majera pert de chisc dis ie stai do Pasca, canche la sajon da inviern fova bele passeda” spiega l assessëur provinziel. (USP)
as
