Atualità
Florian Mussner (3/3): priejes dl strom, Cësa tlima y Unesco
La politica dl’energia ie de plu che la SEL, l vën laurà per pité miëur priejes dl strom y la ublianza de Cësa tlima “A” per frabiches nueves, muessa mo unì penseda sëura: chësc à l assessëur Florian Mussner stlarì te si ancunteda cun jurnalisć’ (NCUEI) ai 05 de agost a Urtijëi. L assessëur se damanda che l ne vënie nia me tëut su la grupa dl Saslonch, ma nce la grupa dl Sela tl raion recunesciù dal Unesco.
Te una dla frabiches publiches plu nueves di luesc ladins, la cësa per studënc Assudëi a Urtijëi, à l assessëur Mussner cialà de reviers ala legislatura che va a piz, fajan al savëi de cie viers che l uel jì inant. Te chësta ucajion al nce rujenà de si ciamps de cumpetënza plu nueves: l’energia y l ambient. N cont dl’energia se damanda Mussner che l ne vënie nia me cialà ala SEL ma a dut l cunzet dl’energia dla Provinzia che se à tëut dant de se destaché dala formes fossiles y de lauré for de plu cun energia alternativa. “Te chësc ciamp se ons tëut dant truep nchin dl 2020 y 2050, y son bele sun la bona streda” à dit l assessëur.
N cont dla sozietà provinziela SEL se tratela de marciadé sun la cunzescions. “On bele nvià via n dialogh y per Persenon sons bele ruvei a una, cun i chemuns dla Venuesta sperons de ruvé prësc a una” nsci Mussner. Do chësc se traterala de ruvé a una cun la ziteies de Bulsan y Maran. Tl medemo mumënt vala nce de sorissé i vantajes cuncrec per i zitadins tres la sozietà provinziela. “Danter chisc nce i miëur priejes dl strom. Da Roma nes iel bele unì segurà che la SEL possa dé ora l strom a de miëura cundizions per cërta categuries” nsci l assessëur.
Mussner à nce tucà l argumënt dl sparani de energia. L cunzet dla Cësa tlima à suzes nce sëura la sëides provinzieles ora, purempò iel da pensé sëura sce l ie propi drët a scrì dant dal 2015 l standard “A” per duta la frabiches nueves. “Ne son nia dla cunvinzion che chësc sibe la miecia, ajache ntant tleca nce l standard “B” y nsci iel mo tëmp per lauré inant sun la tecnologies dla cësa tlima A”, à dit Mussner.
Per l ciamp dl ambient à Mussner tëut posizion sun l’arpejon mundiela Dolomites-Unesco, prejentan na si vijion sun n tëmp plu lonch. L ie de bujën de na majera sensibilisazion per i vantajes che porta l’Arpejon mundiela, te n segondo var dëssa l raion unì svilupà. “Messon arjonjer n raion uniter, purtan ite duta la grupa de Saslonch, y do mi minonga nce duta la grupa dl Sela” à dit l assessëur ai jurnalisć. Mussner ie ruvà al pont che l muessa unì arjont n balanz danter natura y economia”.
as
