Atualità

Scora / Cultura | 06.08.2013 | 16:19

Ai 9 d’agost deura “Por le momënt nia da abiné“ tl Istitut Ladin

En vëndres, ai 9 d’agost jarà inant la linia de mostres artistiches da d’isté tl Istitut Ladin Micurà de Rü cun la daurida dla mostra “Por le momënt nia da abiné“. Te chësta terza esposiziun dla linia de mostres a San Martin de Tor saràl da odëi les operes artistiches de Fabian Feichter.

Fabian Feichter (1986) stüdia scoltöra tl’Academia d’ert figurativa a München, olach’ al vir y laôra. Cun süa ert – tres istalaziuns, video y scoltöres – i va l’artist do ai prozesc d’evoluziun y de trasformaziun dla porsona y dles cosses, se confrontan insciö cun tematiches sciöche la vita y la mort.

Pro la daurida dla mostra, en vëndres ai 9 d’agost dales 18.00, podaràn aldì na introduziun dla curadëssa Katy Moling y parores de salüt dl presidënt y dl diretur dl Istitut Ladin Albert Videsott y Leander Moroder.

L’Istitut Ladin Micurà de Rü, l’EPL (Ert por i Ladins) y la Lia Mostra d’ert, organisadus dla linia de mostres da d’isté, à odü danfora cater mostres a San Martin y por le pröm iade inće öna na mostra a Urtijëi.
Do la mostra “Por le momënt nia da abiné“ jarà la seria de mostres inant cun l’esposiziun “Na vita por l’ert” de Lois Irsara che gnarà daurida ai 23 d’agost. La mostra tla Lia Mostra d’ert a Urtijëi cun operes de Barbara Tavella”Uncutted” sarà da odëi dai 13 de setëmber inant.

An podarà jì a ti ćiarè ales mostres dal lönesc ala sabeda dales 10.00 ales 12.00 y dales 16.00 ales 19.00 y la domënia dales 10.00 ales 12.00. La mostra de Fabian Feichter sarà da odëi ćina ai 19 d’agost. (USP)

as

Galaria dales fotografies