Atualità
Sëuramont danter i obietives de Durnwalder
I chemuns ladins tla provinzia de Belun ie danter i obietives che Durnwalder se à tëut dant per la fin dla legislatura y de si tëmp sciche presidënt dla Provinzia de Bulsan. Chësc al cunedì (NCUEI) 16 de agost n ucajion dla cunferënza stampa da instà a Falzes.
Tl’acurdanza de Milan iel udù danora che la Provinzia de Bulsan spënde 40 milion de euro te chemuns ujins cun l fin de valivé la sëides culturalmënter. „Da pert de Bulsan se parons mo inant acioche chisc scioldi ne vënie nia adurvei per vel proiet a Brescia o sun l lech dl Garda, ma ti chemuns che va veramënter a sëida cun l Sudtirol“ à dit Luis Durnwalder. Tl’ancunteda stata ai prims de agost cun l presidënt di ministri Enrico Letta à Durnwalder fat ora che la maniera de sëurandé i 40 milion de euro dl fondo Odi (ex Brancher) dëssa unì laureda ora da nuef.
Acioche i trëi chemuns storics ladins posse ruvé pra l Sudtirol iel de bujën che la cuestion vënie trateda tl Parlamënt a Roma y che l vënie dat n bënsté da pert de Bulsan y Trënt. “Me aspieti che i trëi chemuns ladins feje plu prescion a Roma acioche la cuestion vede inant” à dit Durnwalder a Falzes, sorissan si posizion de ne ulëi no sburdlé, ma nianca śaré. “I trëi chemuns de sëuramont ie bënunì y l ie drët lauré inant de chësc viers” nsci l presidënt dla Provinzia.
Durnwalder à pona nunzià l problem di cuatieres cunvenzionei che vën nuzei da jënt che ne à nia la residënza ti luesc ladins. Da pert dla Provinzia iel ntant unì metù su n’agenzia de cuntrol. L prim lëur sarà de analisé la situazion y de cuntaté i singuli chemuns. “Per i chemuns de Gherdëina y Badia sarà chësc na sburdla per mëter a post la cuestion” à dit Durnwalder. (USP)
---
Fotos dla cunferënza stampa a Falzes
as
