Atualità
Obietives de Durnwalder: prugramazion urbanistica y acurdanza Letta
La realisazion dla prugramazion urbanistica y l mëter n drova dl’acurdanza cun l presidënt di ministri Letta ie i doi majeri obietives per l’ultima pert de legislatura, che l presidënt dla Provinzia Luis Durnwalder à cunedì te si ultima cunferënza stampa da instà, (NCUEI) ai 16 de agost a Falzes.
Nce sce l ie ultima cunferënza stampa a Falzes, ne ie l tëmp de legislatura mo nia finà y l ie mo truep da lauré – nscì Durnwalder te si cësa a Falzes. “Ulon lauré inant per l bënsté tla Provinzia y tl medemo mumënt l trasfurmé te n se senté bën dla populazion” nscì Durnwalder sorissa de avëi realisà de plu che l ne fova udù dant tl program de coalizion. I doi ponc prinzipei che mancia mo ie la regulamentazion dla toponomastica y dl plan provinziel LEROP. Do analises y studi se tratela mo de l stlù ju. “Tl svilup dl raion provinziel iel tler che la defendura dla puscion muessa avëi priorità” à dit Durnwalder. La se trata aldò dl presidënt dla Provinzia de udëi dant cie che ie mo de bujën n cont de nfrastrutures. N cont di grunc à Durnwalder dit che sce n fossa boni de nuzé miec la cëses che ie bele, ne fossel feter nia de bujën de raions abitatives y raions de produzion nueves.
I programs nviei via dala Union Europea va mo nchin ai prim de jené 2014, perchël se tratela aldò de Durnwalder ti proscimi mënsc de se dé da fé per giapé bona pert de 800 milion de euro udui dant dal Stat y dala UE. L se trata de scioldi udui dant per proiec che possa jì nchin dl 2020, ma che muessa unì mpeniei te chësc mumënt. „Speron de giapé nchin a 20 milion de euro al ann, perchël se tratela śën de marciadé cun l Guviern a Roma“ à dit Luis Durnwalder te si cësa a Falzes.
L’acurdanza sotscrita ai prims de agost a Bulsan da pert de Durnwalder y Letta ie program per i ultimi mënsc de legislatura. Danter i ponc prinzipei che la va de mëter n drova ie la chëuta IMU che dëssa n bona pert resté ai chemuns, la pudëi rujené pea sun co che l vën trat ite la chëutes y la maniera co che la Provinzia de Bulsan dà si cuntribut a ressané la finanzes stateles.
Sëuraprò à Durnwalder mo nunzià la realisazion dl sparani per l frabiché cun programs spezifics per judé ai jëuni che uel se fé n cuatier y l adurvé de 250 milion de euro tres la Sudtirol Finance per sustenì l’economia da tlo. Danter i obietives che n se à tëut dant te chësta legislatura iel nce de fé na lege nueva per sëurandé la cunzescions dal’ega per fé strom. Durnwalder à rujenà de zentreles dal strom cun na produzion sëura 1.000 Kw. „L ie ruvedes ite 300 dumandes a chëles che ulon ti dé na resposta” à dit dla presidënt dla Provinzia.
Sun la mëisa de lëur de Durnwalder iel nce la cuestion dla toponomastica y l sëurandé de cumpetënzes dala Provinzia ai chemuns n cont dla segurëza pra manifestazions publiches.
---
Fotos dla cunferënza stampa a Falzes
as
Galaria dales fotografies
Durnwalder in Pfalzen: Die letzte Bilanz als LH
- Scarica il file audio 3354 kb
