Atualità
Cuntroi di Carabinieri sun i jëufs fej fazion
N rengraziamënt ai Carabinieri per i cuntroi sun la stredes di jëufs: chësc à l assessëur Elmar Pichler Rolle purtà al generale Georg Di Pauli, cumandant regiunel di Carabinieri pra n’ancunteda. Te chësta ucajion iel nce unì rujenà de na valorisazion dl’Arpejon Dolomites-Unesco y de cuntroi te raions sota defendura dla cuntreda.
L generale de birgata Di Pauli ne ie nia me cumandant dl cumando regiunel, ma l mëina nce l zënter di Carabinieri te Sëlva y cunësc a chësta maniera drët bën la situazion tla Dolomites. Un de si prim ntervënc da canche l ie ai prims de chëst ann deventà cumandant regiunel, ie stat chël de mandé Carabinieri cun motores su per i jëufs. "L gran pericul de desgrazies che muev dai motores y la gran fuera che vën fata a furné massa debota, ie states al rejons che à purtà ai cuntroi cun aparac a laser. La majera cumpëida de cuntroi à bele abù fazion ajache danter chëi che va cun l motor se à bele rujenà ncantëur che l vën fat de plu cuntroi" nsci Pichler Rolle.
L assessëur ne à nia me damandà Di Pauli de jì inant cun i cuntroi, ma de ne n lascé fé mo de plu. Chësc, nsci l cumandant, ie na cuestion de despunibltà de culaburadëures. L generale à fat al savëi che l ie stieres a desposizion, che l stop de tò su jënt ie unì tëut demez y che chëi dl Sudtirol ne muessa nia plu fé plu ani de servisc pra i saudeies, dan pudëi unì tëuc su pra i Carabinieri.
N auter argumënt che ie unì tucà tl'ancunteda, ie la revalutazion dl'Arpejon mundiela Dolomites-Unesco. Do che l generale à nunzià de plu problems ti raions sota defendura, iel unì nvià a na senteda cun i respunsabli di Ufizies provinziei per i parcs naturei y per la defendura dla cuntreda. (USP)
as
