Atualità
Film dl’Euregio sun la segurëza a jì cun i schi: prejentazion ai 4 de setëmber
Jì cun i schi y l snowboard ie n devertimënt sce la jënt sun i purtoies se astila nce aldò. Acioche i jëuni se debe ju cun l drë cumpurtamënt ti raions da mont ntan l inviern, iel da pert dl’Euregio unì fat l film “Ski – Fun & Safe”. Chësta produzion unirà prejenteda ai 4 de setëmber tl filmclub a Bulsan deberieda cun l presidënt dla Grupa europea de culaburazion teritoriela (GECT/EVTZ) Luis Durnwalder y dal’ex atleta dl schi Karen Putzer.
Canche te puec mënsc se trajerà i jëuni sëura i schi o l snowboard, dëssi nce vester anjeniei aldò. La segurëza zënza renunzië a devertimënt ie l argumënt zentrel dl film "Ski - Fun & Safe" che ie unì fat per jëuni dai 8 ai 14 ani.
Chësc film ie me curt, ma plën de nfurmazion sun la segurëza a jì cun i schi. L se trata de na produzion sun ncëria dla region europea Tirol-Sudtirol-Trentino (GECT/EVTZ). L film ie pensà per scoles, scoles de schi y lies dal sport dl raion. Per ti ruvé permez plu saurì uniral nce publicà sun You Tube tres internet.
La prejentazion deberieda cun l presidënt dl Grupa europea de culaburazion teritoriela (GECT/EVTZ) Luis Durnwalder y l ex atleta Karen Putzer unirà tenida
n mierculdi, 4 de setëmber 2013
dala 10.30
tl filmclub Capitol
streda Dr. Streiter 8/D
a Bulsan.
Do la prejentazion unirà spartì ora na copia dl film ai prejënc.
Nteressei possa se nunzië per la prejentazion dl film tl ufize dl'Euregio (tel. 0471 402026, e-mail info@europaregion.info).
as
