Atualità

Desvalì | 28.08.2013 | 11:27

Previjions meteo śën nce per l raion ladin (cun audio)

Ala populazion di luesc ladins ti vëniel da śën metù a desposizion previjions dl tëmp plu spezifiches per si raion. L Servisc meteo dla Provinzia de Bulsan pieta da (NCUEI) ai 28 de agost nce previjions meteo per l raion ladin. “Chësc servisc nuef recunësc i luesc ladins y ti dà tl medemo mumënt prejënza ala mendranza ladina tl servisc provinziel plu nuzà” nscì l assessëur Florian Mussner.

Per giapé na previjion spezifica messova la populazion di luesc ladins nchinamò se crì nstëssa la nfurmazion. Śën possen sun la plata web www.provinzia.bz.it/meteo-ladin udëi na rubrica che mostra su la previjions spezifiches per l raion ladin. "La nuvità dl raion ladin tla previjions meteo desmostra la mpurtanza che la Provinzia ti dà ala valedes ladines" sorissea l assessëur Florian Mussner.

L raion nuef "Ladinia - Dolomites" vën pità tla trëi rujenedes ladin, tudësch y talian. A chësta maniera vëniel nce fat promozion dla mendranza ladina. "L servisc meteo ie l servisc provinziel che vën nuzà l plu de duc, la prejënza dl raion ladin pra la previjions meteo à perchël na gran fazion per nosta grupa de rujeneda" mët a cuer l assessëur ladin. La plates web dl servisc meteo ie ntan l ann passà unides vijitedes 33 milion de iedesc y che fej ora 90.410 vijites al di. Ma la previjions meteo ne vën nia me fates al savëi tres la plates internet: uni un possa nce se abuné a n servisc tres e-mail o tres fax. "La stazion dal tëmp a San Martin de Tor nes dà i valores de referimënt per fé la previjions tl raion nuef" spiega Günther Geier, cuordinadëur dl servisc meteo. La previjions per raions vën atualisedes uni di dala 9 da duman y vën tl medemo mumënt nce mandedes ora per e-mail ai abunei. Da nuef iel nce che chësta previjions di raions vën mandedes ora tla trëi rujenedes.

L raion ladin per la previjions meteo ie unì metù a jì dal Servisc de comunicazion y dal Servisc meteo cun l sustëni tecnich dla sozietà de nfurmatica SIAG.

La previjions meteo per ladin ie nchinamò da udëi te na verscion plu scëmpla per l fonin. Te na culaburazion cun l Ufize cuestions linguistiches iesen tl lëur de anjenië nce na verscion mo plu laureda ora y cun de plu nfurmazion da udëi plu saurì tres computer.

L ie nuef mënsc, da dezëmber 2012, che l vën nce pità la previjions meteo tla rujeneda ladina. Nchinamò ie chësc servisc per la populazion ladina unì nuzà drët bën. La singula plates ladines ie unides vijitedes de ndut 19.322 iedesc, che fej ora na media de 2.147 vijites al mëns. (USP)

Previjions meteo per l raion ladin
www.provinzia.bz.it/meteo-ladin/ladinia