Politica | 02.09.2013 | 14:49

Efiziënza energetica: spënt l’ublianza Cësa tlima-A, categuria ressanamënt

Doi nuviteies n cont dl’efiziënza energetica ie (NCUEI) ai 2 de setëmber unides nviedes via dala Jonta provinziela. L’ublianza che cëses nueves muessa arjonjer l livel “Cësa tlima A” ie unida spënta al 2017. Per ressanamënc de vedla cëses uelen mëter a jì na categuria nueva dla zertificazions “Cësa tlima”.

N cont de efiziënza energetica ie la Provinzia de Bulsan bele dai ani danora. La diretives nueves ie da permò unides studiedes tres dai esperc dl'Agenzia Cësa tlima y dla repartizion per urbanistica.

"L'ublianza de arjonjer l livel Cësa tlima A pra frabicac nueves vën spënta de doi ani. Chësc uel di nia plu a scumencé dal 2015 ma dal 2017" à cunedì l presidënt Durnwalder do la senteda dla Jonta provinziela. Chësta dezijion ie unida mutiveda cun la situazion dl custimënt che ie mo for drët aut.

La segonda mudazion reverda l bonus de cubatura per ressanamënc de vedla cëses. "Nchiamò ie chësc bonus unì dat a patrons che porta si cësa a n livel de cunsum energetich C" à dit l presidënt Durnwalder. Dantaprima per frabicac storics ie chësc drët rie da arjonjer. "Chësc livel de Cësa tlima ie pra frabicac storics me da arjonjer sce l vën fat mudazions che reverda nce l cialé ora architetonich" sorissea l assessëur Pichler Rolle.

Per stravardé mudazions architetoniches de frabicac storics, dëssa l bonus de cubatura nce unì dat sce n ne arjonj nia l livel Cësa tlima C. Chësc possa unì fat sce l vën mustrà su che l ie unì fat dut l puscibl per arjonjer n majer miuramënt dl'efiziënza energetica. Aldò dla Jonta provinziela dëssel unì fat na categuria nueva per frabicac storics ressanei che dëssa giapé la denuminazion R (renuvamënt). "Per chësta categuria nueva iel de bujën de na mudazion de lege che ulon purté dant te Cunsëi provinziel" spiega Pichler Rolle.

as