Atualità
La zentrala dl internet aslöm d’Al Plan é en funziun (cun AUDIO)
A Al Plan de Mareo él chisc dis gnü tachè ite i aparać nüs por dè inant i coliamënć de internet aslöm ala popolaziun. “I ùn aspetè ert che la Telecom ativass chësta zentrala, mo śëgn éra tan inant che i zitadins po se colié al internet aslöm y ester colià cun döt le monn” sotrissëia l’assessur provinzial Florian Mussner.
I coliamënć internet tres fira otica ê bele rovà ai pröms d'agost ćina a Al Plan, mo por na rajun burocratica ne n'â la Telecom te chël momënt nia ćiamò podü tachè ite i aparać nüs dla zentrala dl telefonn por dé inant l'internet aslöm. Ai pröms de setëmber à la Telecom spo ativé la zentrala.
Sön l'ultimo tòch de coliamënt, danter la zentrala y les ćiases privates, funzionëia l'internet aslöm inće tres i cabli dl telefonn de ram che é bele. "Por i pröms chilometri dala zentrala, che é tla ćiasa de comun, vëgnel garantì na velozité de 7 ćina 20 Mb/s" spliga l'assessur Mussner.
Por arjunje i raiuns plü dalunc dal zënter d'Al Plan cun l'internet aslöm él debojëgn ćiamò de d'atri toć de fira otica. Aladô dla lege mëss chësta pert, l'ultima milia, gnì fata dal comun. "Por arjunje les fraziuns plü destacades sciöche La Pli y Rina, à la Junta provinziala à bele aprovè da ti impresté 50 miliuns de euro zënza fić ai comuns" spliga l'assessur provinzial por l'internet.
Ajache al é dër d'ütl por la comunanza, l'aministraziun y l'economia da podëi laurè cun de bugn coliamënć internet, àn da pert dl Assessorat provinzial por i laûrs publics fat döt le poscibl por mëte a jì i coliamënć. "Ara à doré dî ajache al é gnü a s'al dè problems tla realisaziun. Aladô di contrać à la Telecom sis mëisc de tëmp por fà süa pert y chilò orunse laurè a na moda che chësta pert vais plü debota tl dagnì" spliga Florian Mussner.
I coliamënć internet aslom röia, por mirit de na colaboraziun cun la RAS y les furnadoies d'Al Plan, da Plan de Corones ćina ala zentrala te paîsc. Por garantì na segurëza dopla él inće gnü metü i rôs por rové cun i cabli de fira otica da Lungega ćina a Al Plan.
I laûrs por portè l'internet aslöm inće ti atri comuns dla Val Badia é bele a n bun punt. La majera pert dles proietaziuns é gnüdes stlütes jö, le finanziamënt assiguré y i laûrs surandà. Tles proscimes edemes gnaràl metü jö i rôs da Lungega a Picolin en colaboraziun cun la forestala. I laûrs che vëgn do sarà a Badia, Longiarü, Rina, Antermëia, La Val y Corvara. "Sce i tignun cunt di laûrs realisà ćina śëgn podunse dì che ćina ala fin dl 2013 sarunse bugn da arjunje düć i comuns dla Val Badia cun la fira otica" à garantì l'assessur provinzial ladin. (USP)
as
Galaria dales fotografies
Florian Mussner sön l¿ativaziun dla zentrala dl internet aslöm a Al Plan
- Scarica il file audio 946 kb
