Atualità
Jonta provinziela: 4,7 percënt zënza lëur, priorità al'ëiles
Nce sce la cumpëida dla persones che à da lëur tl Sudtirol crësc, crësc dal'autra pert nce la cumpëida de chëi che ne à nia da lëur. La Jonta provinziela à (NCUEI) ai 9 de setëmber te si senteda plu curta tratà la problematica. Aldò dl presidënt Durnwalder dëssel unì dat priorità a pruvedimënc per stieres per ëiles y a sburdles per l'economia.
Aldò dla zifres lauredes ora dal Istitut de statistica provinziel ASTAT ie l'ëiles mo plu tuchedes dala dificultà de abiné da lëur. La cuota di zënza lëura resultea de 5,9 percënt pra l'ëiles y 3,7 percënt pra i ëi dl Sudtirol. N generel iel tl Sudtirol a chësta maniera na cuota de 4,7 percënt zënza na stiera.
"Chësta zifres mostra su che messon mo fé de plu acioche l'ëiles posse giapé na stiera" à dit Luis Durnwalder do la senteda dla Jonta provinziela.
La tematica dla jënt che ne à nia da lëur ie plutosc cumplessa. Aldò l presidënt dla Provinzia iel truepa jënt che se à nunzià per la listes di zënza lëur, ma ne ie pona nia a desposizion per la stieres liedies. Chësc fenomenn ie drët desvalif da raion a raion.
Davia che tl Sudtirol vëniel laurà truep tl turism se aspieten de gran mudazions dla zifres di zënza lëur danter i mënsc de sajon turistica y ora de sajon. "La soluzion ne sarà nia pruvedimënc singuli, ma sun n tëmp plu lonch iel de bujën de ti dé sgors al'economia y che firmes gëure sëntes nueves" à dit Luis Durnwalder.
Tla senteda plu curta dla Jonta, per via de na senteda straurdinera te Cunsëi provinziel, iel nce unì stlarì la defrënza de cuotes publichedes ultimamënter. L Istitut de statistica naziunel ISTAT ova fat proves a cajo te 31 chemuns ruvan al resultat de na cuota de 5,4 percënt, tenian cont me dl segondo semester. L istitut provinziel ASTAT à alincontra analisà la situazion sun duc i 116 chemuns dl Sudtirol ti ultimi cater trimestri y ie perchël ruveda sun la cuota de 4,7 percënt zënza lëur. La Jonta provinziela à fat ora che tl daunì dëssa i resultac di doi istituc de statistica unì publichei deberieda.
La problematica dla jënt che ne abina nia da lëura unirà nce trateda tla proscima senteda dla Jonta provinziela deberieda cun i respunsabli di ufizies cumpetënc. (USP)
as
