Atualità
Uneranzes dl Lond Tirol nce per taliani
L Tirol dl Nord y Sudtirol sëurandà ann per ann uneranzes a persunajes che se à fat merit. Sun pruposta dl presidënt dl Tirol Günther Platter à la Jonta provinziela de Bulsan dat pro de plu mudazions ai criteries de sëurandata. Tl daunì dëssa chësta uneranzes nce pudëi unì sëurandates a zitadins de rujeneda taliana.
Tl mpëni de ngrandì la culaburazion sëura la sëida, à la Jonta provinziela dat pro de mudé vel criteries per sëurandé uneranzes da pert dl Lond Tirol. Chësta puscibltà ie unida slargëda ora a duta trëi grupes de rujeneda dl Sudtirol, nce ai zitadins de rujeneda taliana che se à fat merit per la region europea.
La cumpëida de unerei dl Tirol y dl Sudtirol unirà adateda n relazion ala cumpëida dla populazion. Mpede 75 percënt dal Tirol y 25 percënt dal Sudtirol, uniral tl daunì sëurandat uneranzes a 60 percënt dal Tirol y 40 percënt dal Sudtirol. Chësc reverda la uneranzes al merit, la crëusc al merit y la bedaies al merit. Nce l custimënt per la sëurandata unirà spartì su n relazion ala cumpëida di persunajes unerei.
N'autra mudazion simbolica reveda la sotscrizion dla uneranzes che unirà tl daunì fata da tramedoi presidënc de provinzia. (USP)
as
