Atualità
Veles tres lëtra per chëi che ne ie nia a cësa: dezijion spënta
Pra la veles provinzieles ai 27 de utober puderà i zitadins dl Sudtirol che vif oradecà chëst ann per l prim iede lité tres lëtra. Aldò dla lege dëssa chësta puscibltà nce unì data ai zitadins che vif tl Sudtirol, ma che ne sarà l di dla veles nia a cësa. Davia che la problematica reverda de plu regulamënc y nterpretazions de lege ie la dezijions sun la pruzedures unida data inant ala cumiscion de vela.
La Jonta provinziela à tratà l puscibltà de lité tres lëtra davia che l ie mo da stlarì vel pont. "Per i zitadins dl Sudtirol che vif oradecà y che ie scric ite al AIRE, ne iel deguna dificultà", nsci Durnwalder do la senteda dla Jonta. Cun chisc zitadins iel bele unì tëut su cuntat per tëmp y l ti ie bele unì mandà duta la nfurmazions sun la nuvità dla veles tres lëtra. I zitadins scric ite al AIRE che à l dërt de vela, possa nce jì a lité te si chemun de cësa, ma i muessa nchin ai 27 de setëmber fé dumanda al chemun. Nce te chësc cajo ne vëniel chëst ann nia plu dat cuntribuc per l custimënt de viac.
Dlongia i zitadins dl Sudtirol che vif oradecà, possa nce chëi che vif per n pez plu lonch oradecà (p.e. studënc) se nuzé dla vela tres lëtra, scebën che i ne ie nia scric ite al AIRE. Nce te chësc cajo iel de bujën de fé na dumanda sun chemun nchin ai 27 de setëmber (cëla http://lites.provinzia.bz.it/) y de avëi n'adres per n tëmp plu lonch ora dl Sudtirol.
Stlarimënc iel de bujën per chëi che per rejons de feries na sarà ai 27 de utober nia a cësa" à dit Durnwalder. Nce chisc muessa nchin ai 27 de setëmber fé dumanda per veles tres lëtra, ma muessa vester tan giut oradecà che n possa ti mandé i documënc de vela a na maniera che ebe mo l tëmp da i mandé ite nchin ai 25 de utober tla zentrela de vela a Bulsan. Chësta ie la data nchin chëla che duta la ujes tres lëtra muessa ruvé a Bulsan.
L presidënt dla Provinzia Durnwalder à sorissà che l ne sarà nia la Jonta provinziela a nterpreté la lege:"Per chësta rejon damandons la cumiscion de vela, metura adum da magistrac, de stlarì chësc pont te si prima senteda".
as
