Atualità
Jonta provinziela: feries de furmazion, scioldi per paures y cin ciofs
Nsenianc che se anjenià al ejam per l'abilitazion de nsenië, puderà giapé feries de furmazion. La Jonta provinziela à (NCUEI) ai 9 de setëmber, dlongia chësta dezijion nce fat ora de auzé i paiamënc per paures y de valivé la tlassificazion de stëiles, ciofs y surëdli tl turism.
Feries de furmazion per abilitazion
Ai nsenianc che muessa mo fé l ejam de abilitazion de nseniamënt y che fej i cursc de preparazion, ti dëssel unì tëut ju pëis. "Udon ite che l ie na gran cëria de mpëni a mussei mo dlongia la lezions se anjenië per n ejam" à dit l presidënt Durnwalder do la senteda dla Jonta. L assessëures provinziei ie stai a una de judé chisc nsenianc dajan pro feries de furmazion sëuraprò che i nsenianc possa damandé sce i ruva ala strëntes. "Nsenianc possa smëndrì si ëures de nseniamënt a scola y se anjenië al ejam, chësc che ti dà la puscibltà de ruvé pra na stiera segura" à dit Luis Durnwalder.
Categuries nueves: cin surëdli per fitamajons y cin ciofs per luesc da paur
Sibe pra fitamajons che pra feries su luech da paur valova nchinamò cater categuries: la categuria plu auta ie nchinamò cater surëdli pra i fitamajons y cater ciofs pra i luesc da paur. Davia che a livel statel vëniel metù n droa na partizion a cin categuries, à la Jonta provinziela dat pro de ngrandì la partizions a cin categuries nce tl Sudtirol. Luesc da paur puderà nsci ruvé nchin a cin ciofs, fitamajons nchin a cin surëdli.
Da nuef iel nce la cundizions per la categuries plu autes dla feries sun luech da paur. Chiche uel avëi cater o cin ciofs, muessa per ejëmpl avëi fonc de lën te duta la majons y almaco cater prudoc fai nstës. Ëi muessa nce avëi dut l ann almanco sies prudoc sun mëisa de gustè (nce pra cuatieres), n cianton ulache i vënd i prudoc y dé la puscibltà ai fulestieres de lauré pea sun l luech da paur.
Auzà i paiamënc a paures
Tl cheder dl program de svilup europeich per raions ora de zità, vëniel fat paiamënc a paures per valivé ora svantajes tla laurazion ti raions. Chisc paiamënc unirà auzei. "Aldò dla despunibltà de scioldi, nes iel stat mesun auzé chisc paiamënc da 205 euro per hectar, a 245 euro per hectar" à dit l presidënt Durnwalder do che la Jonta provinziela à delibrà l aumënt. (USP)
as
