Atualità
Assessëur Mussner nvieia la jënt ladina a fé pea cuncorsc per stieres tla Sanità
For plu persones se stënta nce tl Sudtirol a abiné da lëur. La Jonta provinziela ie tl lëur traté chësta problematica y per la grupa de rujeneda ladina iel mo pusciblteies de stieres publiches, dantaprima tl ciamp dla Sanità: aldò dl pruporz ti spieta ala grupa de rujeneda ladina tlo mo 160 stieres. Acioche chësta stieres possa nce unì curides da jënt ladina, fej l assessëur ladin Florian Mussner n apel de fé pea i cuncorsc per stieres tla Sanità.
Davia che l'Azienda Sanitera dl Sudtirol ne à nia abinà assé nteressei de rujeneda ladina, iela nchinamò stata sfurzeda a tò su culaburadëures de autra grupes de rujeneda. "Tla Sanità iel 368 stieres ududes dant per la jënt ladina, de chëstes ie 160 stieres mo da curì cun jënt de rujeneda ladina" spiega l assessëur ladin Florian Mussner. La stieres che ti spieta ai ladins ne puderà nia unì curides dutes te un n iede, ma n puech al iede aldò che l'Azienda Sanitera scrij ora cuncorsc.
"Canche l vën scrit ora stieres tla Sanità dëssa la jënt ladina fé pea i cuncorsc, nce sce i ie scric ora per n'autra grupa de rujeneda" mët a cuer l assessëur ladin Mussner, spiegan che sce l'Azienda Sanitera ne abina deguni dla rujeneda damandeda, possa la stiera unì data a zachei de n'autra grupa. "La graduatories che vën fates tres n cuncors vel nchin a doi ani y ie la basa per tò su mo d'autri culaburadëures, zënza scrì ora n cuncors nuef", spiega Mussner.
La 160 stieres che ie mo resservedes ala jënt ladina reverda 20 culaburadëures aministratives, 78 stieres spezialisedes (nce artejans y cueghes) 30 nfermieres, 28 dutores y 5 primares. L'Azienda Sanitera publichea la stieres a desposizion sun si plata web www.sabes.it/de/Stellenangebote.asp.
Tl'aministrazion publica n generel iel de ndut mo feter 360 stieres ududes dant per la populazion ladina che ne ie nia curides. Dlongia chëles tl'Azienda Sanitera, nen iel mo passa 100 te istituzions stateles y feter 40 tla Provinzia. Nteressei a na stiera giapa nfurmazions sun la stieres scrites ora sun la plata web "Arbeitsbörse/Borsa lavoro" al adres www.provinzia.bz.it/arbeit/jobsuche/214.asp.
La dificultà de abiné da lëur se lascia sentì for de plu nce tla valedes ladines. "La situazion se muda dassënn danter la sajons turistiches y ora de sajon", spiega Mussner. Danter jené y merz fovel chëst ann na media de 60 persones scrites ite tla lites de chiche ie a desposizion. Da auril a lugio nen fovel de media 175. "Pra chësta zifres iel da mëter verda ajache les muessa unì metudes n relazion a chëi che ne à nia nteres a se lascé mëter sun la listes" sorissea Mussner. Purempò iel ti prim set mënsc dl 2013 da udëi ora n aumënt de feter 30% permez al ann dant. (USP)
as
